വലിയ സാമ്പത്തിക തട്ടിപ്പുകളും ക്രമക്കേടുകളും സാധാരണ അന്വേഷിക്കുന്ന ഏജൻസി; അറസ്റ്റിനും അധികാരമുണ്ടെന്നത് പ്രതിസന്ധി കൂട്ടും; പിസിയും മകനും നടത്തിയ നീക്കം നിർണ്ണായകമായി; വീണാ വിജയനെ ഉടൻ ചോദ്യം ചെയ്‌തേയ്ക്കും
തിരുവനന്തപുരം: മുഖ്യമന്ത്രി പിണറായി വിജയന്റെ മകൾ വീണാ വിജയന്റെ ഉടമസ്ഥതയിലുള്ള എക്സാലോജിക്ക് കമ്പനിയും സംസ്ഥാന വ്യവസായ വികസന കോർപ്പറേഷനുകീഴിലെ സി.എം.ആർ.എലും തമ്മിലുള്ള ഇടപാടിനെക്കുറിച്ച് അന്വേഷണം പ്രഖ്യാപിച്ച് കേന്ദ്രസർക്കാർ നൽകുന്നത് ശക്തമായ നടപടികൾ ഉണ്ടാകുമെന്ന സൂചന. ബിജെപിയിൽ ചേർന്ന പിസി ജോർജ്ജിന്റേയും മകൻ ഷോൺ ജോർജിന്റേയും ഇടപെടലിന്റെ ഫലമാണ് തീരുമാനം. ബാഹ്യ സമ്മർദ്ദങ്ങൾക്ക് ഏജൻസികൾ വഴിപ്പെടില്ല. ഗുരുതര തട്ടിപ്പുകൾ കൈകാര്യംചെയ്യുന്ന സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്.എഫ്.ഐ.ഒ.) അന്വേഷിക്കണമെന്നാണ് നിർദ്ദേശം. ഇതിന് വേണ്ടിയാണ് ഹൈക്കോടതിയിൽ ഹർജിയുമായി ഷോൺ ജോർജ്ജ് പോയതും. ഈ സാഹചര്യത്തിൽ ഇനിയുള്ള എട്ടുമാസം പിണറായി കുടുംബത്തിന് നിർണ്ണായകമാണ്.
വീണാ വിജയൻ ഉൾപ്പെട്ട മാസപ്പടിവിവാദം കത്തിപ്പുകയവേ കേന്ദ്ര കോർപ്പറേറ്റ് മന്ത്രാലയത്തിനുകീഴിലെ ഏറ്റവും ഉന്നതതലത്തിലുള്ള അന്വേഷണമാണ് ഇപ്പോൾ പ്രഖ്യാപിച്ചിട്ടുള്ളത്. പ്രതിപ്പട്ടികയിലുള്ളവരെ അറസ്റ്റു ചെയ്യാൻ അധികാരമുള്ള ഏജൻസിയാണ് ഇത്. മറ്റ് അന്വേഷണ സംവിധാനങ്ങൾക്ക് പ്രതികളെ അറസ്റ്റു ചെയ്യാൻ കഴിയുമായിരുന്നില്ല. അതുകൊണ്ട് തന്നെ എസ് എഫ് ഐ ഒ അന്വേഷണം പിണറായിക്കും മകൾക്കും നിർണ്ണായകമാണ്. ഭാര്യ വിരമിച്ചപ്പോൾ കിട്ടിയ പണം കൊണ്ടാണ് മകൾ ബിസിനസ് തുടങ്ങിയതെന്ന് കഴിഞ്ഞി ദിവസം മുഖ്യമന്ത്രി പറഞ്ഞിരുന്നു. ഈ സാഹചര്യത്തിൽ മുഖ്യമന്ത്രിയുടെ ഭാര്യ കമലയുടെ അക്കൗണ്ട് വിവരങ്ങളും പരിശോധിക്കാൻ സാധ്യത ഏറെയാണ്. വീണയെ ഉടൻ ചോദ്യം ചെയ്‌തേയ്ക്കും.
അഡീഷണൽ ഡയറക്ടർ പ്രസാദ് അഡെല്ലിയുടെ നേതൃത്വത്തിലുള്ള ആറംഗസംഘത്തെ അന്വേഷണത്തിനായി ചുമതലപ്പെടുത്തി. കോർപ്പറേറ്റ്കാര്യമന്ത്രാലയത്തിലെ ഉന്നതതല ഉദ്യോഗസ്ഥരും ഈ സംഘത്തിൽ ഉൾപ്പെടും. ഡെപ്യൂട്ടി ഡയറക്ടർ അരുൺ പ്രസാദിനെ ഇൻവെസ്റ്റിഗേറ്റിങ് ഓഫീസറായി നിശ്ചയിച്ചതായി ഉത്തരവിൽ അറിയിച്ചു. ഇപ്പോഴുള്ള അന്വേഷണോദ്യോഗസ്ഥരും സംഘത്തിലുണ്ട്. എട്ടുമാസത്തിനുള്ളിൽ റിപ്പോർട്ട് സമർപ്പിക്കാനാണ് നിർദ്ദേശം. എക്സാലോജിക് ഉൾപ്പെടെയുള്ള പ്രശ്‌നങ്ങളിൽ ആരോപണം ഉയർന്നതിനെപ്പറ്റി നിയമസഭയിൽ ചർച്ചവന്നപ്പോൾ തന്റെ കൈകൾ ശുദ്ധമെന്നായിരുന്നു മുഖ്യമന്ത്രിയുടെ മറുപടി. രാഷ്ട്രീയലക്ഷ്യംവച്ചാണ് കേന്ദ്രാന്വേഷണമെന്ന് സിപിഎമ്മും കുറ്റപ്പെടുത്തിയിരുന്നു. അന്നു തന്നെ കേന്ദ്ര ഏജൻസിയുടെ അന്വേണഷവും വരുന്നുവെന്നതാണ് വസ്തുത.
ഇടപാടിൽ ദുരൂഹതയുണ്ടെന്ന് ചൂണ്ടിക്കാട്ടി ആർ.ഒ.സി. (രജിസ്ട്രാർ ഓഫ് കമ്പനീസ്) യുടെ റിപ്പോർട്ടും അടുത്തിടെ പുറത്തുവന്നിരുന്നു. ആർ.ഒ.സി. ആവശ്യപ്പെട്ട രേഖകൾ എക്സാലോജിക്ക് സമർപ്പിച്ചിരുന്നില്ല. കരാറിന്റെ വിശദാംശങ്ങളും ഹാജരാക്കിയില്ല. ജി.എസ്.ടി. അടച്ചുവെന്ന് മാത്രമാണ് എക്സാലോജിക് മറുപടി നൽകിയത്. ഇടപാട് വിവരം സി.എം.ആർ.എൽ. മറച്ചുവെച്ചെന്നും റിലേറ്റഡ് പാർട്ടിയായ എക്സാലോജിക്കുമായുള്ള ഇടപാട് അറിയിച്ചില്ലെന്നും ആർ.ഒ.സി. റിപ്പോർട്ടിൽ പരാമർശിച്ചു. ഈ ആർ.ഒ.സി. റിപ്പോർട്ടാണ് വിഷയത്തിൽ കോർപറേറ്റ് അഫയേഴ്സ് മന്ത്രാലയത്തിന്റെ വിശദമായ അന്വേഷണത്തിലേക്ക് വഴിതെളിച്ചത്.
എക്‌സാലോജിക്കിന് എതിരായ എസ്എഫ്‌ഐഒ അന്വേഷണ പരിധിയിൽ പൊതുമേഖലാ സ്ഥാപനമായ കെഎസ്‌ഐഡിസിയും ഉൾപ്പെടും. എക്സാലോജിക്ക്-സിഎംആർഎൽ ഇടപാട് അന്വേഷണവും എസ്എഫ്‌ഐഒയുടെ പരിധിയിലായിരിക്കും. വലിയ സാമ്പത്തിക തട്ടിപ്പുകളും ക്രമക്കേടുകളുമാണ് സാധാരണ എസ്എഫ്‌ഐഒ അന്വേഷിക്കുന്നത്. മന്ത്രാലയത്തിന് കീഴിൽ നിലവിലുള്ള ഏറ്റവും വലിയ അന്വേഷണ എജൻസിയാണ് എസ്എഫ്‌ഐഒ. അറസ്റ്റ് അടക്കമുള്ള കാര്യങ്ങൾക്ക് എസ്എഫ്‌ഐഒയ്ക്ക് അധികാരമുണ്ടെന്നത് കേസിന്റെ പ്രാധാന്യം വ്യക്തമാക്കുന്നു.
