ന്യൂഡൽഹി: സ്വവർഗ വിവാഹത്തിന്റെ നിയമസാധുത തേടിയുള്ള വിധി പ്രസ്താവത്തിനിടെ നിർണായകമായി ചീഫ് ജസ്റ്റിസ് ഡി വൈ ചന്ദ്രചൂഢീന്റെ വിധിയിലെ പരാമർശങ്ങൾ. സ്വവർഗ പങ്കാളികളുടെ ദത്തെടുക്കലിനെപ്പറ്റി നിർണായകമായ പരാമർശങ്ങളാണ് കോടതി നടത്തിയത്. ഭിന്നലിംഗക്കാരായ ദമ്പതികൾക്ക് മാത്രമേ നല്ല മാതാപിതാക്കളാകാൻ കഴിയൂ എന്ന് നിയമത്തിന് അനുമാനിക്കാൻ കഴിയില്ലെന്നും അങ്ങനെ ചെയ്യുന്നത് വിവേചനത്തിന് കാരണമാകുമെന്നും ചീഫ് ജസ്റ്റിസ് ഡി വൈ ചന്ദ്രചൂഡ് പറഞ്ഞു.

ദത്തെടുക്കലിനുള്ള സെൻട്രൽ അഡോപ്ഷൻ റിസോഴ്സ് അഥോറിറ്റി (സിഎആർഎ) മാർഗനിർദ്ദേശങ്ങൾ പരാമർശിച്ചുകൊണ്ട്, ജുവനൈൽ ജസ്റ്റിസ് നിയമം അവിവാഹിതരായ ദമ്പതികളെ ദത്തെടുക്കുന്നതിൽ നിന്ന് തടയുന്നില്ലെന്നും, അങ്ങനെ ചെയ്യുന്നത് കുട്ടിയുടെ താൽപ്പര്യത്തിനാണെന്നും യൂണിയൻ ഓഫ് ഇന്ത്യയും തെളിയിച്ചിട്ടില്ല. അതിനാൽ അവിവാഹിതരായ ദമ്പതികളെ ദത്തെടുക്കുന്നത് തടയാൻ സിഎആർഎക്ക് ഇനി മുതൽ അധികാരമില്ലെന്നും ജസ്റ്റിസ് ചന്ദ്രചൂഡ് വ്യക്തമാക്കി.

അവിവാഹിതരായ ദമ്പതികൾ മാത്രമാണ് അവരുടെ ബന്ധത്തെക്കുറിച്ച് ഗൗരവമായി കാണുന്നു എന്ന് കരുതാനാവില്ല. വിവാഹിതരായ ഭിന്നലിംഗ ദമ്പതികൾക്ക് മാത്രമേ ഒരു കുട്ടിക്ക് സ്ഥിരത നൽകാൻ കഴിയൂ എന്ന് തെളിയിക്കാൻ രേഖകളൊന്നുമില്ലെന്നും അദ്ദേഹം ചൂണ്ടിക്കാട്ടി. സ്വവർഗ വിഭാഗമെന്നത് നഗര വരേണ്യവർഗമല്ലെന്നും കോടതി വ്യക്തമാക്കി.

സ്വവർഗരതി വിഡ്ഢിത്തമോ ഒരു നഗര സങ്കൽപ്പമോ സമൂഹത്തിലെ ഉയർന്ന വിഭാഗങ്ങളിൽ മാത്രമായി പരിമിതപ്പെടുത്തപ്പെട്ടതോ അല്ല. സ്വവർഗാനുരാഗികൾ നഗരത്തിലും വരേണ്യ ഇടങ്ങളിലും മാത്രമേ ഉള്ളൂ എന്ന് ചിത്രീകരിക്കുന്നത് അവരെ ഇല്ലായ്മ ചെയ്യലാണെന്നും ചീഫ് ജസ്റ്റിസ് പറഞ്ഞു.

സ്വവർഗ വ്യക്തികൾ ഉൾപ്പെടെ എല്ലാ വ്യക്തികൾക്കും അവരുടെ ജീവിതത്തിന്റെ ധാർമ്മിക നിലവാരം വിലയിരുത്താൻ അവകാശമുണ്ട്. അതേസമയം പൊലീസ് ഇവരെ വിളിച്ചു വരുത്തി ഇവരുടെ സെക്ഷ്വൽ ഐഡന്റിറ്റി നടത്താൻ പാടില്ലെന്നും അദ്ദേഹം പറഞ്ഞു. യാതൊരു തരത്തിലുള്ള ഹോർമോൺ ചികിത്സയും പാടില്ല. നിർബന്ധിച്ച് ഇവരെ കുടുംബത്തിനൊപ്പം വിടാൻ പാടില്ലെന്നും ചീഫ് ജസ്റ്റിസ് വ്യക്തമാക്കി.

ക്വിയർ വ്യക്തികളോട് വിവേചനം കാണിക്കാൻ പാടില്ലെന്നും കോടതി വ്യക്തമാക്കി. ഭിന്നലിംഗത്തിലുള്ള ദമ്പതികൾക്ക് ലഭിക്കുന്ന ഭൗതിക ആനുകൂല്യങ്ങളും സേവനങ്ങളും സ്വവർഗ ദമ്പതികൾക്ക് നിഷേധിക്കുന്നത് അവരുടെ മൗലികാവകാശത്തിന്റെ ലംഘനമായിരിക്കുമെന്നുമുള്ള വളരെ പ്രസ്‌ക്തമായ പരാമർശങ്ങളാണ് കോടതി നടത്തിയത്.

സ്വാതന്ത്ര്യത്തിന്റെ അർത്ഥം എന്നത് തന്നെ അയാൾ ആഗ്രഹിക്കുന്നത് ആവുക എന്നതാണ്. സ്വവർഗ വ്യക്തികൾ ഉൾപ്പെടെ എല്ലാ വ്യക്തികൾക്കും അവരുടെ ജീവിതത്തിന്റെ ധാർമ്മിക നിലവാരം വിലയിരുത്താൻ അവകാശമുണ്ട്. ഒരു ജീവിത പങ്കാളിയെ തിരഞ്ഞെടുക്കുന്നത് ഒരാളുടെ ജീവിത ഗതി തെരഞ്ഞെടുക്കുന്നതിന്റെ അവിഭാജ്യ ഘടകമാണ്. ചിലർ ഇത് തങ്ങളുടെ ജീവിതത്തിലെ ഏറ്റവും പ്രധാനപ്പെട്ട തീരുമാനമായി കണക്കാക്കാം. ഈ അവകാശം ആർട്ടിക്കിൾ 21 പ്രകാരം ജീവിക്കാനും സ്വാതന്ത്ര്യത്തിനുമുള്ള അവകാശത്തിന്റെ ഭാഗമാണ്.

ഉടമ്പടിയിൽ പ്രവേശിക്കാനുള്ള അവകാശത്തിൽ ഒരാളുടെ പങ്കാളിയെ തെരഞ്ഞെടുക്കാനുള്ള അവകാശവും ആ ഉടമ്പടിയെ അംഗീകരിക്കാനുള്ള അവകാശവും ഉൾപ്പെടുന്നു. ഇത്തരം കൂട്ടുകെട്ടുകൾ അംഗീകരിക്കുന്നതിൽ പരാജയപ്പെടുന്നത് സ്വവർഗ ദമ്പതികളോടുള്ള വിവേചനത്തിന് കാരണമാകും-ചീഫ് ജസ്റ്റിസ് വ്യക്തമാക്കി.

മറുനാടന്‍ ഡെസ്‌ക്‌

    മറുനാടന്‍ ഡെസ്‌ക്‌