കൊച്ചി: പെരുമ്പാവൂര്‍ കെഎസ്ആര്‍ടിസി ബസ്റ്റാന്‍ഡില്‍ നിന്നും ബൈക്ക് മോഷ്ടിച്ച കേസില്‍ പ്രതി അറസ്റ്റില്‍. തൊടുപുഴ മലങ്കര ഡാമിന് സമീപം പള്ളിപ്പറമ്പില്‍ വീട്ടില്‍ ബിനോയ് ബിജു (19) നെയാണ് പെരുമ്പാവൂര്‍ പോലീസ് പിടികൂടിയത്. കഴിഞ്ഞ 26 ന് ആണ് സംഭവം.

കെഎസ്ആര്‍ടിസി സ്റ്റാഫിന്റെ പാര്‍ക്കിംഗ് ഏരിയയില്‍ നിന്ന് ജീവനക്കാരന്റെ ബൈക്ക് മോഷ്ടിച്ച് കൊണ്ടു പോവുകയായിരുന്നു. തുടര്‍ന്ന് പെരുമ്പാവൂര്‍ പൊലീസ് നടത്തിയ ശാസ്ത്രീയമായ അന്വേഷണത്തില്‍ തൊടുപുഴ ഭാഗത്ത് നിന്നും പ്രതികളെ പിടികൂടി.

ഇയാളുടെ കൂടെ പ്രായപൂര്‍ത്തിയാകാത്ത രണ്ടു കുട്ടികളും മോഷണത്തിനായി ഉണ്ടായിരുന്നു. ചോദ്യം ചെയ്തതില്‍ ഇവര്‍ പിറവം ഭാഗത്തുനിന്നും ഒരു ബൈക്ക് മോഷണം നടത്തിയതായി പൊലീസിനോട് പറഞ്ഞു. ഇന്‍സ്‌പെക്ടര്‍ എ.കെ സുധീര്‍, സബ് ഇന്‍സ്‌പെക്ടര്‍ പിഎം റാസിക്, എ.എസ്.ഐ പി.എ.അബ്ദുള്‍ മനാഫ്, സീനിയര്‍ സി പി ഒ മാരായ കെ.എസ് സുധീഷ് ,ബെന്നി ഐസക്ക് തുടങ്ങിയവരാണ് അന്വേഷണ സംഘത്തിലുളളത്.