സ്വകാര്യ ബസും കാറും കൂട്ടിയിടിച്ച് രണ്ടുപേർ മരിച്ചു; മൂന്നുപേർക്ക് പരിക്ക്; അപകടം ചേർപ്പുളശ്ശേരി-ഒറ്റപ്പാലം റോഡിൽ കുറ്റിക്കോട് വളവിൽ

മലപ്പുറം: സ്വകാര്യ ബസും കാറും കൂട്ടിയിടിച്ചുണ്ടായ അപകടത്തിൽ കാർയാത്രക്കാരായ രണ്ടുപേർ മരിച്ചു. ചെർപ്പുളശ്ശേരി ഒറ്റപ്പാലം റോഡിൽ കുറ്റിക്കോട് വളവിൽ സ്വകാര്യ ബസും കാറും കൂട്ടിയിടിച്ചുണ്ടായ അപകടത്തിൽ ഏലംകുളം സ്വദേശികളായ രണ്ടു കാർ യാത്രക്കാരാണ് മരിച്ചത്. പെരിന്തൽമണ്ണ ഏലംകുളം പറമ്പ് സ്വദേശി പുത്തൻ വീട്ടിൽ ശ്രീനാഥ്(35), ഏലംകുളം തോട്ടശ്ശേരി മനോജ് (35) എന്നിവരാണ് മരിച്ചത്. കാറിൽ ഇവർക്കൊപ്പമുണ്ടായിരുന്ന സുരേഷ്, സുധീഷ് , അരുൺ എന്നിവരെ പരിക്കുകളോടെ വിവിധ ആശുപത്രികളിൽ പ്രവേശിപ്പിച്ചു.

ചെർപ്പുളശ്ശേരി ഭാഗത്തു നിന്നും ഒറ്റപ്പാലം ഭാഗത്തേക്ക് പോവുകയായിരുന്ന സ്വകാര്യബസും എതിരെ വന്ന കാറും തമ്മിലാണ് കുറ്റിക്കോട് വളവിൽ കൂട്ടിയിടിച്ചത്. അപകടത്തിൽ കാറിന്റെ മുൻവശം പൂർണ്ണമായും തകർന്നു. ഓടിക്കൂടിയ നാട്ടുകാർ ചേർന്നാണ് ഇവരെ പുറത്തെടുത്തത്. ഉടൻ തന്നെ ഇവരെ ആശുപത്രിയിലെത്തിച്ചെങ്കിലും ഗുരുതരമായി പരിക്കേറ്റ ശ്രീനാഥും മനോജും മരണപ്പെടുകയായിരുന്നു.അപകടത്തെ തുടർന്ന് ഏറെ നേരം പാതയിൽ ഗതാഗതക്കുരുക്കും അനുഭവപ്പെട്ടു.

ഡിവൈഎഫ്ഐ. ഏലംകുളം മേഖലാ സെക്രട്ടറിയും പെരിന്തൽമണ്ണ ബ്ലോക്ക് നിർവാഹകസമിതി അംഗവും സിപിഎം. ചൈതന്യ ബ്രാഞ്ച് അംഗവുമാണ് ശ്രീനാഥ് . ഏലംകുളത്ത് അക്ഷയ കേന്ദ്രം നടത്തി വരികയായിരുന്നു. പിതാവ്: പരേതനായ ഗോപിനായർ. മാതാവ്: നളിനി. ഭാര്യ: പ്രിയ. മകൾ: വൈഗ(ഏലംകുളം സൗത്ത് സ്‌കൂൾ ഒന്നാം ക്ലാസ് വിദ്യാർത്ഥിനി). ഏലംകുളം തോട്ടശ്ശേരി അപ്പുണ്ണി നായരുടെയും ലക്ഷ്മിക്കുട്ടിയമ്മയുടെയും മകനാണ് മനോജ് .പ്ലംബിങ്, വയറിങ് ജോലിയായിരുന്നു. ഭാര്യ: വിബിത.