ഇന്നോവ കാർ ബൈക്കിനു പിറകിലിടിച്ച് ഒന്നര വയസ്സുകാരിക്ക് ദാരുണാന്ത്യം; അമ്മയ്ക്ക് പരുക്ക്

മലപ്പുറം: ഇന്നോവ കാർ ബൈക്കിനു പിറകിലിടിച്ച് ഒന്നര വയസ്സുകാരി മരിച്ചു. മാതാവിനും പരുക്ക്. മലപ്പുറം ചെരണി സ്വദേശി മാഞ്ചേരി തുപ്പത്തുകുരിക്കൾ വീട്ടിൽ ജസീലിന്റെ മകൾ ജസയാണ് മരിച്ചത്. അപകടത്തിൽ ജസീലിനും ഭാര്യ ജസീല (28) ക്കും നിസാരമായ പരിക്കേറ്റു.

ഇവർ മഞ്ചേരി മെഡിക്കൽ കോളജ് ആശുപത്രിയിൽ ചികിത്സ തേടി. വെള്ളിയാഴ്ച വൈകിട്ട് മൂന്നരയോടെയാണ് അപകടം. കുട്ടശ്ശേരിയിലെ ജസീലിന്റെ ഭാര്യവീട്ടിൽ നിന്നും മടങ്ങി വരുന്നതിനിടെ വണ്ടൂർ ഭാഗത്ത് നിന്നും വരികയായിരുന്ന ഇന്നോവ കാർ ബൈക്കിനു പിറകിലിടിക്കുകയായിരുന്നു. ഇതോടെ ജസ ബൈക്കിൽ നിന്നും തെറിച്ചു വീണു.

ഉടനെ തൊട്ടടുത്ത സ്വകാര്യ ക്ലിനിക്കിലും പിന്നീട് മഞ്ചേരി മെഡിക്കൽ കോളജ് ആശുപത്രിയിലെത്തിച്ചെങ്കിലും രക്ഷിക്കാനായില്ല. മഞ്ചേരി പാണ്ടിക്കാട് റോഡിൽ ചുമട്ടുതൊഴിലാളിയാണ് ജസീൽ. മൃതദേഹം മെഡിക്കൽ കോളജ് മോർച്ചറിയിൽ. പോസ്റ്റ്‌മോർട്ട നടപടികൾക്ക് ശേഷം ശനിയാഴ്ച പകൽ 11 മണിക്ക് സെൻട്രൽ ജുമാ മസ്ജിദിൽ ഖബറടക്കും. സഹോദരൻ: ജിഷാൻ