കണ്ണൂർ :പയ്യന്നൂർ സ്റ്റേഷനിൽ നിന്നും യാത്ര പുറപ്പെട്ട പാസഞ്ചർ ട്രെയിനിൽ ഓടിക്കയറവെ വീണ് പരിക്കേറ്റ ഛത്തീസ്‌ഗഡ് പാർസഭാർ സ്വദേശിയായ റെയിൽവേ ഉദ്യോഗസ്ഥൻ മരിച്ചു. പയ്യന്നൂർ റെയിൽവേ സ്റ്റേഷനിലെ റിസർവേഷൻ ക്ലർക്ക് മംഗളുരുവിൽ താമസിക്കുന്ന കുര്യാക്കോസ് എക്ക (48)യാണ് കണ്ണൂർ ഗവ.മെഡിക്കൽ കോളജ് ആശുപത്രിയിൽ മരണമടഞ്ഞത്.

ചൊവ്വാഴ്ച വൈകീട്ട് നാലോടെയാണ് അപകടം. ജോലി കഴിഞ്ഞ് താമസസ്ഥലമായ മംഗലൂരുവിലെ താമസസ്ഥലത്തേക്ക് പോകാൻ കോയമ്പത്തൂരിൽ നിന്ന് മംഗലൂരുവിലേക്ക് പോവുകയായിരുന്ന പാസ്സഞ്ചർ ട്രെയിനിൽ കയറുന്നതിനിടെയാണ് വീണത്.

ഓടി തുടങ്ങിയ വണ്ടി നിർത്തിയാണ് വണ്ടിക്കും പ്ലാറ്റ്ഫോമിനും ഇടയിൽ കുടുങ്ങിയ കുര്യാക്കോസിനെ കണ്ണൂർ ഗവ.റെയിൽവെ പൊലീസിലെ സീനിയർ സിപി.ഒ ബിജുവും മറ്റ് റെയിൽവെ ജീവനക്കാരും ചേർന്നാണ് ആശുപത്രിയിലെത്തിച്ചത്.

കൈ അറ്റ നിലയിലായിരുന്നു, തലക്കും ശരീരത്തിന്റെ ഭാഗങ്ങളിലും പരിക്കുകളുണ്ടായിരുന്നു. ബുധനാഴ്‌ച്ചപുലർച്ചെ 12.30നായിരുന്നു അന്ത്യം. മൃതദേഹം മെഡിക്കൽ കോളേജ് മോർച്ചറിയിൽ. കണ്ണൂർ റെയിൽവെ പൊലീസ് മൃതദേഹം ഇൻക്വസ്റ്റ് നടത്തി. മൃതദേഹം നിയമനടപടികൾക്കു ശേഷം ബന്ധുക്കൾക്ക് വിട്ടു നൽകുമെന്ന് പയ്യന്നൂർ പൊലിസ് അറിയിച്ചു.