കണ്ണൂർ: യുവാവിന്റെ മുഖത്ത് ആസിഡ് ഒഴിച്ച സംഭവത്തിൽ പ്രതിയെ പിടികൂടി പൊലീസ്. കമ്പല്ലൂർ സ്വദേശി റോബിനാണ് അറസ്റ്റിലായത്. ഞായറാഴ്ച രാത്രി 10 മണിയോടെയാണ് യുവാവിന് നേരെ ആസിഡ് ആക്രമണം ഉണ്ടായത്. പെരുന്തട സ്വദേശി രാജേഷിന്റെ (47) മുഖത്തായിരുന്നു റോബിൻ ആസിഡ് ഒഴിച്ചത്.

രാജേഷ് വീട്ടിലിരിക്കുന്നതിനിടയിലായിരുന്നു ആക്രമണം നടന്നത്. ആസിഡ് ഒഴിച്ചതിന് ശേഷം റോബിൻ ഓടിമറയുകയായിരുന്നു. തുടർന്ന്, പൊലീസ് നടത്തിയ അന്വേഷണത്തിലാണ് പ്രതി കുടുങ്ങിയത്. പരിക്കേറ്റ രാജേഷ് പരിയാരം മെഡിക്കൽ കോളേജ് ആശുപത്രിയിൽ ചികിത്സയിലാണ്.