കോഴഞ്ചേരി: കനത്ത വേനൽ മഴയിൽ ആറന്മുള പാർത്ഥസാരഥി ക്ഷേത്രത്തിന്റെ വടക്കേ ഗോപുരത്തോട് ചേർന്നുള്ള മതിൽ ഇടിഞ്ഞു. ക്ഷേത്രത്തിൽ നിന്നും പമ്പാ നദിയിലേക്ക് ഇറങ്ങുന്ന ഭാഗത്തിനും വടക്കേ ഊട്ടുപുരക്കും ഇടയ്ക്കുള്ള മതിലാണ് ഇടിഞ്ഞത്. രണ്ടു നിലയുള്ള ഊട്ടുപുരയ്ക്കും വിള്ളലുണ്ട്്. ഇന്നലെ വൈകുന്നേരം അഞ്ചോടെയാണ് സംഭവം. മഴ പെയ്തിരുന്നതിനാൽ അധികമാരും അവിടെ ഇല്ലാതിരുന്നത് വലിയ അപകടം ഒഴിവാക്കി. പതിറ്റാണ്ടുകളുടെ പഴക്കമുള്ളതാണ് മതിൽ. കിഴക്കേ നടയിൽ നിന്നും ഊട്ടുപുരക്ക് താഴെക്കൂടി നദിയിലേക്ക് പോകുന്ന റോഡിലേക്കാണ് മതിൽ ഇടിഞ്ഞ് അവശിഷ്ടങ്ങൾ പതിച്ചത്. വള്ളം കളിക്കും വള്ളസദ്യക്കും ജനം തിങ്ങിക്കൂടുകയും കടന്നു പോകുകയും ചെയ്യുന്ന സ്ഥലമാണിത്.

രണ്ട് നിലകളിലായുള്ള വടക്കേ ഊട്ടുപുരയിൽ നിന്നും സദ്യക്ക് ശേഷം പുറത്തേക്ക് പോകുന്നതും ഇത് വഴിയാണ്. ആറന്മുള ക്ഷേത്രത്തിലെ ഭജനമിരുപ്പുകാർ പലപ്പോഴും വിശ്രമത്തിനായി മതിൽക്കകത്തെ ഈ ഭാഗം തെരഞ്ഞെടുക്കാറുണ്ട്. ക്ഷേത്രത്തിലെ പ്രധാന കുടിവെള്ള സംഭരണിയും ഇതിനോട് ചേർന്നാണ്. മതിലിന് പതിറ്റാണ്ടുകളുടെ പഴക്കം ഉണ്ടെങ്കിലും വർഷാവർഷം ഒരു കുമ്മായം തേയ്ക്കൽ മാത്രമാണ് ചെയ്യുന്നത്. മറ്റ് അറ്റകുറ്റ പണികളോ സംരക്ഷണമോ നടത്താറില്ല. കിഴക്കേ ഗോപുരത്തിന്റെ തെക്കുഭാഗത്തെ മതിലും അപകടാവസ്ഥയിലായിട്ട് കാലങ്ങളായി. ഇവിടെയും ദേവസ്വം മരാമത്ത് വിഭാഗം ഒന്നും ചെയ്തിട്ടില്ല.

പുതിയ നിർമ്മിതികൾ പലതും ക്ഷേത്രത്തിൽ ഉണ്ടായെങ്കിലും പഴമ സംരക്ഷിക്കാനുള്ള നടപടികൾ ഉണ്ടാകാത്തതാണ് ഇപ്പോഴത്തെ അപകടത്തിന് കാരണം. വർഷങ്ങൾക്ക് മുൻപ് പടിഞ്ഞാറേ ഗോപുര ഭാഗവും കാലവർഷത്തിൽ ഇടിഞ്ഞിരുന്നു. ഇത് പുനർ നിർമ്മിക്കാൻ വർഷങ്ങൾ വേണ്ടിവന്നു. കിഴക്കേ ഗോപുരമാകട്ടെ പൊളിച്ചിട്ടിട്ട് മാസങ്ങളായി. കാലവർഷം ആയപ്പോൾ ടാർപ്പാളിൻ ഉപയോഗിച്ച് മൂടി വച്ചിരിക്കുകയാണ്. മഹാ ക്ഷേത്രം എന്ന നിലയിലും വള്ളസദ്യയുടെ കണക്കിലും വരവ് ഏറെ ആണെങ്കിലും വികസന പ്രവർത്തനങ്ങളുടെ കാര്യത്തിൽ ഏറെ പിന്നാക്കമാണ് ആറന്മുള പാർത്ഥ സാരഥി ക്ഷേത്രം.