തൃശ്ശൂരിൽ ഓട്ടോയ്ക്ക് തീപിടിച്ചു ഒരാൾ മരിച്ചു; കത്തിയത് പെരിങ്ങാവിലുള്ള ഓട്ടോയെന്ന് പൊലീസ്

തൃശ്ശൂർ: ഓട്ടോയ്ക്ക് തീപിടിച്ച് ഒരാൾ മരിച്ചു. തൃശ്ശൂർ പെരിങ്ങാവ് ഗാന്ധിനഗർ സ്ട്രീറ്റിലാണ് സംഭവം. മരിച്ചയാളെ തിരിച്ചറിഞ്ഞിട്ടില്ല. എങ്ങനെയാണ് ഓട്ടോയ്ക്ക് തീപിടിച്ചതെന്നും വ്യക്തമല്ല. ശനിയാഴ്ച ഉച്ചയ്ക്ക് രണ്ടുമണിയോടെയാണ് നിർത്തിയിട്ടിരുന്ന ഓട്ടോയ്ക്ക് തീപിടിച്ചത് നാട്ടുകാരുടെ ശ്രദ്ധയിൽപ്പെട്ടത്. ഉടൻതന്നെ അഗ്‌നിരക്ഷാസേനയെ വിവരമറിയിച്ചു. തുടർന്ന് അഗ്‌നിരക്ഷാസേനയെത്തി തീയണച്ചതോടെയാണ് ഓട്ടോയുടെ പിറകിലെ സീറ്റിൽ കത്തിക്കരിഞ്ഞനിലയിൽ ഒരാളെ കണ്ടെത്തിയത്.

പുതിയ രജിസ്ട്രേഷനിലുള്ള സി.എൻ.ജി. ഓട്ടോയ്ക്കാണ് തീപിടിച്ചതെന്നാണ് പൊലീസ് പറയുന്നത്. ഇത് പെരിങ്ങാവിലുള്ള ഓട്ടോയാണെന്നും പൊലീസ് തിരിച്ചറിഞ്ഞിട്ടുണ്ട്. ഓട്ടോ ഡ്രൈവർ ആരാണെന്നതടക്കം കണ്ടെത്താനായി പൊലീസിന്റെ അന്വേഷണം തുടരുകയാണ്.