കെ സി എയ്ക്ക് വീഴ്ച പറ്റി; തുറന്നുസമ്മതിച്ച് ഭാരവാഹികള്‍; കോച്ച് മനുവിനെ സംരക്ഷിച്ചിട്ടില്ല; എതിര്‍ക്കുന്നവര്‍ മാറ്റിനിര്‍ത്തപ്പെട്ടവര്‍
തിരുവനന്തപുരം: ആരോപണ വിധേയനായ ക്രിക്കറ്റ് പരിശീലകന്‍ മനുവിനെ ഏതെങ്കിലും തരത്തില്‍ സംരക്ഷിക്കാന്‍ ശ്രമിച്ചിട്ടില്ലെന്ന് കേരള ക്രിക്കറ്റ് അസോസിയേഷന്. അത്തരത്തിലൊരാളെ സംരക്ഷിച്ചുനിറുത്തേണ്ട ആവശ്യവും അസോസിയേഷനില്ല. ഇത്തരമൊരു വ്യക്തിയെ സംരക്ഷിച്ചുകൊണ്ട് ആരോപണത്തിന്റെ കരിനിഴലില്‍ നില്‍ക്കാന്‍ ഉദ്ദേശിക്കുന്ന സംഘടനയല്ല ക്രിക്കറ്റ് അസോസിയേഷന്. മനുവിനെതിരായ കേസന്വേഷണവുമായി എല്ലാവിധത്തിലും സഹകരിക്കുന്നുണ്ടെന്നും കേരള ക്രിക്കറ്റ് അസോസിയേഷന് പ്രസിഡന്റ് ജയേഷ് ജോര്‍ജ് വാര്‍ത്താ സമ്മേളനത്തില്‍ വ്യക്തമാക്കി.
കെ.സി.എയ്ക്ക് വീഴ്ച പറ്റിയിട്ടുണ്ട്. അതില്‍ നിന്നും ഒഴിഞ്ഞുമാറുന്നില്ല. മനുവിന്റെ പ്രവൃത്തികള്‍ ഒരിക്കലും ന്യായീകരിക്കുന്നില്ല. മനുവിന്റെ കോച്ചിങ് സര്‍ട്ടിഫിക്കേഷന്‍ റദ്ദാക്കും. ഇയാള്‍ പെണ്‍കുട്ടികളുടെ മാത്രം കോച്ച് ആയിരുന്നില്ല. പുതിയ പരിശീലകര്‍ക്ക് പോലീസ് ക്ലിയറന്‍സ് സര്‍ട്ടിഫിക്കറ്റ് നിര്‍ബന്ധമാക്കും. മനുവിനെതിരെ പരാതിവന്നപ്പോള്‍ കെ.സി.എ അന്വേഷണത്തോട് പൂര്‍ണമായും സഹകരിച്ചു.
ഇരകളോ കുടുംബാംഗങ്ങളോ കെ.സി.എയ്ക്കെതിരെ പരാതി പറയുന്നില്ല. മനുവിനെ സംരക്ഷിക്കാന്‍ കേരള ക്രിക്കറ്റ് അസോസിയേഷന് ഭീഷണിപ്പെടുത്തിയെന്നും പരാതിയില്ല. ഇവിടെ, എതിര്‍ക്കുന്നവര്‍ പല കാലങ്ങളില്‍ കെ.സി.എ.യില്‍നിന്ന് പലതവണയായി മാറ്റിനിര്‍ത്തപ്പെട്ടവരാണ്. കോച്ചുകള്‍ തമ്മിലുള്ള പ്രശ്നമുള്ളവരുമുണ്ട്. ഇവരാണ് ചാനലുകളില്‍ കെ.സി.എ പ്രതിയെ സംരക്ഷിക്കുന്നു എന്ന് പറയുന്നത്.
2012 ഒക്ടോബര്‍ 12നാണ് മനു തിരുവനന്തപുരം ജില്ലാ ക്രിക്കറ്റ് അസോസിയേഷനില്‍ പരിശീലകനായെത്തുന്നത്. 2022ല്‍ മനുവിനെതിരായ ആദ്യ ആരോപണം ഉയര്‍ന്നുവെങ്കിലും അപ്പോഴും കുട്ടികളോ രക്ഷിതാക്കളോ അസോസിയേഷനില്‍ ഏതെങ്കിലും വിധത്തില്‍ പരാതി നല്‍കിയിരുന്നില്ല. ചൈല്‍ഡ് ലൈനും പോലീസും അന്വേഷണവുമായി എത്തുമ്പോള്‍ മാത്രമാണ് ഇക്കാര്യങ്ങള്‍ അസോസിയേഷന് അറിയുന്നത്.
തുടര്‍ന്ന് മനുവിനെ പരിശീലക സ്ഥാനത്തുനിന്നു മാറ്റിയെങ്കിലും മനുവിനുകീഴില്‍ പരിശീലനത്തിലുണ്ടായിരുന്ന കുട്ടികളും അവരുടെ രക്ഷിതാക്കളും അയാള്‍ക്കുവേണ്ടി രംഗത്തെത്തി. മനുവിനെ നിലനിറുത്തണമെന്നും സെലക്ഷനുമായി ബന്ധപ്പെട്ട ചില പ്രശ്‌നങ്ങള്‍ മൂലം മനപ്പൂര്‍വ്വം മനുവിനെതിരെ ആരോപണം ഉന്നയിക്കുന്നതാണെന്നുമായിരുന്നു അവരുടെ വാദം. മനുവിനെ തിരിച്ചെടുക്കണമെന്ന് ഇവര്‍ ആവശ്യപ്പെട്ടെങ്കിലും ആദ്യം അസോസിയേഷന് അതിനു തയ്യാറായില്ല. പിന്നീട് ഈ കുട്ടികളും രക്ഷിതാക്കളും പോലീസിലുള്‍പ്പെടെ മനുവിന് അനുകൂലമായി മൊഴി നല്‍കുകയും മനുവിന് ജാമ്യം ലഭിക്കുകയും ചെയ്ത പശ്ചാത്തലത്തിലാണ് ഇയാളെ തുടരാന്‍ അനുവദിച്ചത്. പിന്നീട് ഈ കേസില്‍ കോടതി മനുവിനെ തെളിവില്ലെന്നുകണ്ട് വെറുതേവിടുകയും ചെയ്തു.
അതേസമയംതന്നെ പരിശീലനത്തിനെത്തുന്ന കുട്ടികളുടെ സുരക്ഷ വര്‍ധിപ്പിക്കാന്‍ ഒട്ടേറെ നടപടികളും അസോസിയേഷന് കൈക്കൊണ്ടു. ആണ്‍കുട്ടികള്‍ക്കും പെണ്‍കുട്ടികള്‍ക്കും ഒരേസമയം തന്നെയാണ് പരിശീലനം നല്‍കുന്നത്. പരിശീലന സ്ഥലത്ത് കൂടുതല്‍ നിരീക്ഷണ ക്യാമറകള്‍ സ്ഥാപിക്കുകയും സെക്യൂരിറ്റി ജീവനക്കാരുടെ സേവനം കൂടുതല്‍ കാര്യക്ഷമമാക്കുകയും ചെയ്തു. 2015 മുതല്‍ പരിശീലനം നല്‍കുന്ന ഇടം പൂര്‍ണമായും ക്യാമറ നിരീക്ഷണത്തിലാണ്. നിലവില്‍ 20 നിരീക്ഷണ ക്യാമറകളാണ് ഇവിടെയുള്ളത്. കളിക്കളത്തിനടുത്ത് ഏതെങ്കിലും രക്ഷിതാക്കളുണ്ടാകണമെന്നു നിബന്ധന പരിശീലനം തുടങ്ങുന്ന കാലം മുതലേ പാലിച്ചുവന്നിരുന്നു.
തന്റെ മകള്‍ക്ക് മനു വേണ്ടവിധത്തിലുള്ള പരിശീലനം നല്‍കുന്നില്ലെന്നു കാട്ടി 2024 ഏപ്രില്‍ 19ന് ഒരു രക്ഷിതാവ് ജില്ലാ അസോസിയേഷനില്‍ പരാതി നല്‍കിയിരുന്നു. 2022ലെ കേസില്‍ മനുവിന് അനുകൂലമായി പോലീസിലും കോടതിയിലും മൊഴി നല്‍കിയവരായിരുന്നു ഇവര്‍. ഈ പരാതിയില്‍ മനുവിനോട് വിശദീകരണം ആവശ്യപ്പെട്ടെങ്കിലും ഏപ്രില്‍ 21ന് മനു രാജിക്കത്ത് നല്‍കി. ബാംഗ്ലൂരില്‍ മറ്റൊരു ജോലിയില്‍ പ്രവേശിക്കുന്നതിനുവേണ്ടിയാണ് രാജിവയ്ക്കുന്നതെന്നായിരുന്നു പറഞ്ഞിരുന്നത്.
എന്നാല്‍ രാജിയ്ക്ക് നടപടിക്രമമുള്ളതിനാല്‍ നോട്ടീസ് കാലാവധി പൂര്‍ത്തിയാക്കണമെന്ന് മനുവിനോട് അസോസിയേഷന് ആവശ്യപ്പെട്ടു. ആ കാലവധിക്കുള്ളിലാണ് പിങ്ക് ടൂര്‍ണമെന്റ് നടക്കുന്നത്. ആ സമയത്തൊന്നും മനുവിനെതിരേ ലൈംഗികാരോപണ കേസുകള്‍ ഉണ്ടായിരുന്നുമില്ല. മനുവിനെതിരായി നല്‍കിയ പരാതിയില്‍ അസോസിയേഷന് ജില്ലാ ഘടകം പരാതിക്കാരന് മെയ് 5ന് മറുപടി നല്‍കുകയും ചെയ്തു. കെസിഎയ്ക്ക് പരാതി ലഭിച്ചിട്ടും അത് പൂഴ്ത്തിവച്ചുവെന്ന ആരോപണം കെ.സി.എയെ തകര്‍ക്കാന്‍ കരുതിക്കൂട്ടി ഉന്നയിക്കുന്നതാണ്.
ജൂണ്‍ ആദ്യ ആഴ്ചയിലാണ്, നേരത്തേ ഇവിടെ പരിശീലനം നേടിയിരുന്ന ഒരു പെണ്‍കുട്ടിയും രക്ഷിതാവും മനുവിനെതിരെ പുതിയ ആരോപണവുമായി പോലീസിനെ സമീപിക്കുന്നതും തുടര്‍ന്ന് അസോസിയേഷനിലെത്തി വാക്കാല്‍ വിവരം പറയുന്നതും. ഈ പരാതിക്ക് അടിസ്ഥാനമായ സംഭവം നടക്കുന്നത് 2018ലാണ്. പരാതിക്കാരിയായ പെണ്‍കുട്ടി കോവിഡിനു മുന്‍പ് ഇവിടെ പരിശീലനത്തില്‍ പങ്കെടുത്തിരുന്നയാളാണ്. അതുകൊണ്ടുതന്നെ 2022ലെ കേസിനും പരാതിക്കും ശേഷം മനുവിനെ കെ.സി.എ സംരക്ഷിച്ചുവെന്നും അതേതുടര്‍ന്നാണ് തുടര്‍സംഭവങ്ങളുണ്ടായതെന്നുമുള്ള ആരോപണങ്ങള്‍ തികച്ചും വസ്തുതാവിരുദ്ധമാണ്.
പരാതികള്‍ ഉണ്ടായാല്‍ യഥാസമയം അവ പരിശോധിക്കുന്നതിനും നടപടികള്‍ കൈക്കൊള്ളുന്നതിനുമായി വനിതകളടങ്ങുന്ന ആഭ്യന്തര പരാതിപരിഹാര കമ്മിറ്റി രൂപീകരിക്കാന്‍ അസോസിയേഷന് തീരുമാനമെടുത്തിട്ടുണ്ട്. അതിക്രമങ്ങളുണ്ടായാല്‍ കുട്ടികള്‍ രക്ഷിതാക്കളോടുപോലും പറയാന്‍ മടിക്കുന്ന സാഹചര്യം ഉണ്ട്. അതു പരിഹരിക്കാനായി കുട്ടികള്‍ക്കെതിരായ അതിക്രമങ്ങള്‍ തടയുന്നതിന് പ്രവര്‍ത്തിക്കുന്ന 'ദില്‍സെ' എന്ന സര്‍ക്കാരേതര സംഘടനയുടെ സഹായത്തോടെ കുട്ടികള്‍ക്ക് ആവശ്യമായ പരിശീലനവും കൗണ്‍സിലിംഗും നല്‍കന്നതിനുള്ള പരിപാടിക്ക് തുടക്കമിട്ടിട്ടുണ്ട്. മനുവിനു കീഴില്‍ പരിശീലനം ലഭിച്ചിരുന്ന കുട്ടികള്‍ക്ക് ബാലാവകാശ കമ്മീഷന്റെ സഹായത്തോടെ പ്രത്യേക കൗണ്‍സിംഗ് നല്‍കാന്‍ കെ.സി.എ തീരുമാനിച്ചിട്ടുണ്ട്.
പുതിയ പരാതി ഉയര്‍ന്ന സാഹചര്യത്തില്‍ മനുവിനെ പരിശീലകനായി നിയോഗിക്കരുതെന്ന് കെ.സി.എ എല്ലാ സംസ്ഥാന ക്രിക്കറ്റ് അസോസിയേഷനുകളേയും രേഖാമൂലം അറിയിച്ചു. നാഷണല്‍ ക്രിക്കറ്റ് അക്കാദമിയിലെ മനുവിന്റെ കോച്ചിംഗ് സര്‍ട്ടിഫിക്കേഷന്‍ റദ്ദാക്കാനും കെ.സി.എ. നിര്‍ദ്ദേശം നല്‍കി. ജില്ലാ അസോസിയേഷനുകളിലുള്‍പ്പെടെ പുതുതായി പരിശീലകരേയും ജീവനക്കാരേയും നിയമിക്കുമ്പോള്‍ പോലീസ് ക്ലിയറന്‍സ് സര്‍ട്ടിഫിക്കറ്റും നിര്‍ബന്ധമാക്കിയിട്ടുമുണ്ട്.
പരിശീലനത്തിനായി രജിസ്റ്റര്‍ ചെയ്‌തെത്തുന്ന കുട്ടികളുടെ മാനസ്സികവും കായികവുമായ വികസനത്തിനാണ് അസോസിയേഷന് പ്രാധാന്യം നല്‍കുന്നത്. പെണ്‍കുട്ടികള്‍ക്ക് സ്‌റ്റൈപ്പന്‍ഡ് ഉള്‍പ്പെടെയുള്ള ആനുകൂല്യങ്ങളും അസോസിയേഷന് നല്‍കുന്നുണ്ട്. അവരുടെ സുരക്ഷ ഉറപ്പാക്കിക്കൊണ്ടല്ലാതെ അസോസിയേഷന് മുന്നോട്ടുപോകാനുമാകില്ല. ഇക്കാര്യത്തില്‍ യാതൊരു വിട്ടുവീഴ്ചയ്ക്കും തയ്യാറല്ലെന്നും അസോസിയേഷന് ഭാരവാഹികള്‍ വ്യക്തമാക്കി.
