മലപ്പുറം: തന്റെ മാമ്പഴക്കടയിലെ ജീവനക്കാരനായിരുന്ന യുവാവിനെ തോക്കു ചൂണ്ടി ഭീഷണിപ്പെടുത്തുകയും കാറിടിച്ച് കൊലപ്പെടുത്താൻ ശ്രമിക്കുകയും ചെയ്ത കേസിൽ 48 കാരൻ പൊലീസിന്റെ പിടിയിലായി. പുന്നക്കാട് മില്ലുംപടി സ്വദേശി കപ്പൂത്ത് നിഷാന്തിനെയാണ് കരുവാരക്കുണ്ട് സ്റ്റേഷൻ ഹൗസ് ഓഫീസർ സി.കെ.നാസറും സംഘവും അറസ്റ്റ് ചെയ്തത്.

ഇന്നു രാവിലെ പത്തോടെ കരുവാരക്കുണ്ട് പുന്നക്കാട് അങ്ങാടിയിലാണ് സിനിമാ സ്റ്റൈൽ സംഭവം നടന്നത്. പ്രതിയായ നിഷാന്ത് തന്റെ ഫോർച്യുണർ കാറിടിച്ച് നിസാം എന്ന യുവാവിനെ കൊലപ്പെടുത്താൻ ശ്രമിച്ചെന്നും തോക്കുചൂണ്ടി ഭീഷണിപ്പെടുത്തിയെന്നുമാണ് കേസ്. കരുവാരക്കുണ്ട് പുന്നക്കാട് സ്വദേശി വി.നിസാമിന്റെ പരാതിയിലാണ് നിഷാന്തിനെ പൊലീസ് പിടികൂടിയത്.

നിസാമും സുഹൃത്ത് അബ്ദു റസാഖും ഏതാനും മാസങ്ങളായി പ്രതിയായ നിഷാന്തിന്റെ ഉടമസ്ഥതയിലുള്ള മഞ്ചേരിയിലെ മാമ്പഴക്കടയിൽ ജോലി ചെയ്തു വരികയായിരുന്നു. ഇടയ്ക്കുണ്ടായ അഭിപ്രായ വ്യത്യാസത്തെ തുടർന്ന് നിസാമും അബ്ദു റസാഖും ജോലി ഉപേക്ഷിക്കുകയും ചെയ്തു. ഇതിന്റെ ദേഷ്യത്തിലാണ് പ്രതി യുവാക്കളെ കൊലപ്പെടുത്താൻ ശ്രമിച്ചത്. എന്നാൽ ഭീഷണിപ്പെടുത്താൻ ഉപയോഗിച്ച തോക്ക് പൊലീസ് അന്വേഷിച്ചുവരികയാണ്. പ്രതിയെ മഞ്ചേരി കോടതിയിൽ ഹാജരാക്കി.

 

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍