കുളിക്കുന്നതിനിടെ സ്ത്രീയെ കയറിപ്പിടിച്ച് കൊലപ്പെടുത്താൻ ശ്രമം; ചാത്തന്നൂരിൽ പ്രതി പിടിയിൽ

കൊല്ലം: സ്ത്രീയോട് ലൈംഗികാതിക്രമം നടത്തി കൊലപ്പെടുത്താൻ ശ്രമിച്ചയാളെ പൊലീസ് പിടികൂടി. ചാത്തന്നൂർ, കാട്ടുവിള വീട്ടിൽ പാപ്പച്ചന്റെ മകൻ റിനു പാപ്പച്ചൻ (35) ആണ് ചാത്തന്നൂർ പൊലീസിന്റെ പിടിയിലായത്. കഴിഞ്ഞ 30 ന് വൈകിട്ട് 5 മണിയോടെ വീട്ടുവളപ്പിലെ കുളിമുറിയിൽ കുളിക്കുകയായിരുന്ന സ്ത്രീയെ കയറിപിടിച്ച് ലൈംഗികാതിക്രമം നടത്തിയ കുറ്റത്തിനാണ് ഇയാളെ പൊലീസ് അറസ്റ്റ് ചെയ്തത്.

അപ്രതീക്ഷിതമായ ആക്രമണത്തിൽ ഭയന്ന് നിലവിളിച്ച സ്ത്രീയെ ഇയാൾ കഴുത്തിന് കുത്തിപ്പിടിച്ച് കൊലപ്പെടുത്താൻ ശ്രമിച്ചെങ്കിലും ഓടി രക്ഷപ്പെടുകയായിരുന്നു. ബലാൽസംഗ ശ്രമത്തിനിടയിൽ രക്ഷപ്പെട്ട് ഓടിയ സ്ത്രീക്ക് വീഴ്ചയിൽ പരിക്കേൽക്കുകയും ചെയ്യ്തു. തുടർന്ന് ചാത്തന്നൂർ പൊലീസിൽ നൽകിയ പരാതിയുടെ അടിസ്ഥാനത്തിലാണ് പൊലീസ് കേസ് രജിസ്റ്റർ ചെയ്യ്ത് ഇയാളെ പിടികൂടിയത്. ചാത്തന്നൂർ ഇൻസ്‌പെക്ടർ ശിവകുമാറിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ അറസ്റ്റ് ചെയ്തത്.