ആലപ്പുഴയിൽ കെ എസ് എഫ് ഇ വനിതാ ഏജന്റിനെ ഓഫീസിനുള്ളിൽ വെട്ടി പരിക്കേൽപ്പിച്ചു; ആക്രമിച്ച സഹോദരീ ഭർത്താവ് കസ്റ്റഡിയിൽ

ആലപ്പുഴ: കെഎസ്എഫ്ഇ വനിതാ ഏജന്റിനെ ഓഫീസിനുള്ളിൽ വെച്ച് വെട്ടിപരിക്കേൽപിച്ചു. കളർകോട് കെഎസ്എഫ്ഇ ശാഖയിൽ, കളക്ഷൻ ഏജന്റായ പുന്നപ്ര കാളുതറ സ്വദേശിയായ മായാദേവിക്കാണ് പരിക്കേറ്റത്. പുന്നപ്ര തെക്ക് പഞ്ചായത്ത് ആറാം വാർഡ് കാളുതറ വീട്ടിൽ രാഗേഷിന്റെ ഭാര്യ മായ (37) യ്ക്കാണ് വെട്ടേറ്റത്. കഴുത്തിന് പിൻഭാഗത്ത് വെട്ടേറ്റ മായയെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

സംഭവവുമായി ബന്ധപ്പെട്ട് മായയുടെ സഹോദരിയുടെ ഭർത്താവ് കൈചൂണ്ടി കളരിക്കൽ ശ്രീവിഹാറിൽ സുരേഷ് ബാബുവിനെ ആലപ്പുഴ സൗത്ത് പൊലീസ് കസ്റ്റഡിയിൽ എടുത്തു. തിങ്കളാഴ്ച പകൽ ഒരുമണിയോടെ കെ.എസ്.എഫ്.ഇ. കളർകോട് ശാഖയിൽ പണമടക്കാൻ എത്തിയതായിരുന്നു മായ. ജീവനക്കാരിയുമായി സംസാരിച്ച് നിൽക്കുന്നതിനിടെ സ്ഥാപനത്തിലേക്ക് അതിക്രമിച്ച് കടന്നെത്തിയ സുരേഷ് ബാബു മായയെ പിന്നിൽനിന്നും വെട്ടുകയായിരുന്നു.

ആക്രമിക്കുന്നതിനിടെ സുരേഷ് ബാബുവിന്റെ കൈയിൽനിന്നും ആയുധം തെറിച്ചുപോയി. വീണ്ടും ആയുധം എടുക്കാൻ ശ്രമിക്കുന്നതിനിടെ ഓഫീസിലെ മറ്റുജീവനക്കാരെത്തി ഇയാളെ കീഴ്പ്പെടുത്തുകയായിരുന്നു. മായാദേവിയുടെ സഹോദരി നൽകിയ പരാതിയിൽ സുരേഷ് കുമാർ ജയിലിലായിരുന്നു. രണ്ട് ദിവസം മുൻപാണ് ഇയാൾ ജയിൽ മോചിതനായത്. കള്ളക്കേസിൽ കുടുക്കിയെന്ന് ആരോപിച്ചായിരുന്നു ആക്രമണം.