കാർഷിക സൊസൈറ്റിയിൽ കോടികളുടെ തിരിമറി; മുൻ പ്രസിഡന്റ് പിടിയിൽ

കോഴിക്കോട്: കാർഷിക സൊസൈറ്റിയുടെ പേരിൽ നിരവധിയാളുകളിൽ നിന്നും നിക്ഷേപമായി സ്വീകരിച്ച തുകയിൽ വെട്ടിപ്പ് നടത്തിയ പ്രതി പിടിയിൽ. കോഴിക്കോട് കുമാരസ്വാമി കേന്ദ്രീകരിച്ച് പ്രവർത്തിച്ച ജില്ലാ ലേബർ സോഷ്യൽ വെൽഫെയർ സൗസൈറ്റിയുടെ പ്രസിഡന്റായിരുന്ന കുരുവട്ടൂർ സ്വദേശി കെ. ഷാഗിലിനെയാണ് ക്രൈം ബ്രാഞ്ച് ഡിവൈ.എസ്‌പി പ്രമോദും സംഘവും അറസ്റ്റ് ചെയ്തത്.

2022ലാണ് കേസിനാസ്പദമായ പരാതി ലഭിക്കുന്നത്. സൊസൈറ്റിയിൽ തങ്ങൾ നിക്ഷേപിച്ച പണം തിരികെ ലഭിക്കുന്നില്ലെന്ന പരാതിയുമായി നിക്ഷേപകർ കാക്കൂർ പൊലീസിനെ സമീപിക്കുകയായിരുന്നു. തുടർന്ന് കേസ് രജിസ്റ്റർ ചെയ്തു. രണ്ട് കോടിയോളം രൂപയുടെ നിക്ഷേപം നടന്നിട്ടുണ്ടെന്ന് ബോധ്യമായതിനാൽ കേസ് ക്രൈം ബ്രാഞ്ചിന് കൈമാറുകയായിരുന്നു. കാറ്റ്കോസ് എന്ന പേരിലാണ് കാർഷിക സൊസൈറ്റി രജിസ്റ്റർ ചെയ്തിരിക്കുന്നത്.

2015 മുതൽ 2020 വരെ ഇയാൾ സ്ഥാപനത്തിന്റൈ പ്രസിഡന്റായിരുന്നു. സമാന രീതിയിൽ നരിക്കുനി, താമരശ്ശേരി എന്നിവിടങ്ങളിലും ഇയാൾ തട്ടിപ്പിന് ശ്രമിച്ചതായി സൂചനയുണ്ട്. വ്യാജരേഖ ചമയ്ക്കൽ, വിശ്വാസ വഞ്ചന, സാമ്പത്തിക തട്ടിപ്പ് തുടങ്ങിയ കുറ്റങ്ങൾ ഉൾപ്പെടുന്ന ഐ.പി.സി 406, 409, 420, 468 തുടങ്ങിയ വകുപ്പുകളാണ് പ്രതിക്കെതിരേ ചുമത്തിയിരിക്കുന്നത്. ജുഡീഷ്യൽ ഫസ്റ്റ്ക്ലാസ് മജിസട്രേറ്റ് കോടതി മൂന്നിൽ ഹാജരാക്കിയ പ്രതിയെ റിമാൻഡ് ചെയ്തു.