കോഴിക്കോട്: കെ മുരളീധരന് പിന്തുണ അറിയിച്ച് കോഴിക്കോട് ഫ്ലക്സ് ബോർഡ്. നയിക്കാൻ നായകൻ വരട്ടെ എന്ന് ഫ്‌ളക്‌സ് ബോർഡിൽ പറയുന്നു. നയിക്കാൻ നിങ്ങളില്ലെങ്കിൽ ഞങ്ങളുമില്ലെന്നും ഫ്‌ളക്‌സിൽ പറയുന്നു. കോൺഗ്രസ് പ്രവർത്തകരുടെ പേരിലാണ് നഗരത്തിൽ വണ്ടിപ്പേട്ടയിലടക്കം ഫ്‌ളക്‌സ് സ്ഥാപിച്ചിട്ടുള്ളത്.

'അന്ന് വടകരയിൽ... പിന്നെ നേമത്ത്... ഇന്ന് തൃശൂരിൽ... അങ്ങ് പോരാട്ടത്തിനിറങ്ങിയത് ഈ പ്രസ്ഥാനത്തിന്റേയും പ്രവർത്തകരുടേയും അഭിമാനം സംരക്ഷിക്കാനാണ്. മതേതരത്വത്തിനായി അചഞ്ചലമായി നിലകൊണ്ടതിന്റെ പേരിലാണ് ഇന്ന് നിങ്ങൾ പോരാട്ടഭൂമിയിൽ വെട്ടേറ്റു വീണത്. നയിക്കാൻ നിങ്ങളില്ലെങ്കിൽ ഞങ്ങളുമില്ല. ഒരിക്കൽ കൂടി പറയുന്നു പ്രിയപ്പെട്ട കെഎം നിങ്ങൾ മതേതര കേരളത്തിന്റെ ഹൃദയമാണ്'. എന്നാണ് പോസ്റ്ററിൽ എഴുതിയിട്ടുള്ളത്.

തൃശൂരിലെ തോൽവിക്ക് പിന്നാലെ പൊതു പ്രവർത്തനവും സജീവ രാഷ്ട്രീയവും നിർത്തുകയാണെന്ന് കെ മുരളീധരൻ പ്രസ്താവിച്ചിരുന്നു. ഇനി മത്സരത്തിനോ, പാർട്ടി നേതൃത്വത്തിലേക്കോ ഇല്ലെന്നും മുരളീധരൻ പറഞ്ഞു. ഒരു കാരണവശാലും കോൺഗ്രസ് വിടില്ലെന്നും, തദ്ദേശ തെരഞ്ഞെടുപ്പ് സമയത്ത് കോൺഗ്രസിന് വേണ്ടി പ്രചാരണത്തിന് ഉണ്ടാകുമെന്നും മുരളീധരൻ വ്യക്തമാക്കിയിരുന്നു. കെപിസിസി പ്രസിഡന്റ് കെ സുധാകരൻ പിണങ്ങി നിൽക്കുന്ന മുരളീധരനെ അനുനയിപ്പിക്കാൻ അദ്ദേഹത്തിന്റെ വസതിയിലെത്തി കൂടിക്കാഴ്ച നടത്തിയിരുന്നു.