തൃശൂർ: ഗുരുവായൂർ ക്ഷേത്രത്തിൽ ജൂലൈ ഒന്നുമുതൽ ഉദയാസ്തമന പൂജാ ദിനങ്ങളിലും പൊതു അവധി ദിവസങ്ങളിലും വിഐപി/സ്പെഷ്യൽ ദർശനങ്ങൾക്ക് നിയന്ത്രണം. ഭക്തജനങ്ങൾക്ക് സുഗമമായ ദർശനമൊരുക്കാൻ ഉദയാസ്തമന പൂജാ ദിനങ്ങളിലും പൊതു അവധി ദിവസങ്ങളിലും ജൂലൈ ഒന്നുമുതൽ രാവിലെ 7 മുതൽ ഉച്ചയ്ക്ക് 2 മണി വരെ വിഐപി / സ്പെഷ്യൽ ദർശനങ്ങൾക്ക് നിയന്ത്രണം ഏർപ്പെടുത്താൻ ഗുരുവായൂർ ദേവസ്വം ഭരണസമിതി തീരുമാനിച്ചു.

വരി നിൽക്കുന്ന ഭക്തർക്ക് സുഖദർശനമൊരുക്കാനാണ് ദേവസ്വം ഭരണസമിതി നിയന്ത്രണം ഏർപ്പെടുത്തിയത്. ചോറൂണ് വഴിപാട് കഴിഞ്ഞ കുട്ടികൾക്കുള്ള സ്പെഷ്യൽ ദർശനവും ശ്രീകോവിൽ നെയ്യ് വിളക്ക് വഴിപാടുകാർക്കുള്ള ദർശനത്തിനും നിയന്ത്രണം ബാധകമല്ല. പൊതു അവധി ദിനങ്ങളിൽ കൂടുതൽ ഭക്തർക്ക് ദർശന സൗകര്യം ഒരുക്കുന്നതിന് ക്ഷേത്രം ഉച്ചയ്ക്ക് ശേഷം 3.30 ന് തുറക്കാനും ദേവസ്വം ഭരണസമിതി തീരുമാനിച്ചു.

ഭരണ സമിതി യോഗത്തിൽ ചെയർമാൻ ഡോ.വികെ വിജയൻ അധ്യക്ഷനായി. ഭരണ സമിതി അംഗങ്ങളായ പിസി ദിനേശൻ നമ്പൂതിരിപ്പാട്, വിജി രവീന്ദ്രൻ, കെപി വിശ്വനാഥൻ, അഡ്‌മിനിസ്ട്രേറ്റർ കെപി വിനയൻ എന്നിവർ സന്നിഹിതരായി.