കുതിരാൻ തുരങ്കത്തിൽ ബൈക്ക് അപകടം; യുവാവ് മരിച്ചു, 17കാരൻ ഗുരുതരാവസ്ഥയിൽ

തൃശ്ശൂർ: കുതിരാൻ തുരങ്കത്തിനുള്ളിലുണ്ടായ ബൈക്ക് അപകടത്തിൽ യുവാവ് മരിച്ചു. ചിറ്റിലഞ്ചേരി സ്വദേശി വിനു(24)വാണ് മരിച്ചത്. ഒപ്പമുണ്ടായിരുന്ന എളനാട് സ്വദേശി മിഥുനെ (17) ഗുരുതര പരിക്കുകളോടെ തൃശ്ശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

ഞായറാഴ്ച രാത്രി എട്ടുമണിയോടെ പാലക്കാട് ഭാഗത്തേക്കുള്ള പാതയിലാണ് അപകടമുണ്ടായത്. നിയന്ത്രണം നഷ്ടപ്പെട്ട ബൈക്ക് തുരങ്കത്തിനുള്ളിലെ രണ്ടാമത്തെ ഇടനാഴി തുരങ്കത്തിന്റെ തൂണിൽ ഇടിച്ചായിരുന്നു അപകടം. അപകടത്തിൽ ബൈക്ക് പൂർണമായും തകർന്നു.

പട്ടിക്കാടുനിന്നുള്ള ആംബുലൻസിലാണ് ഇരുവരെയും ആശുപത്രിയിൽ പ്രവേശിപ്പിച്ചത്. ഗുരുതര പരിക്കേറ്റ് ചികിത്സയിലുള്ള മിഥുൻ ചുവന്നമണ്ണിൽ പഞ്ചർ കടയിലെ ജീവനക്കാരനാണ്. രക്ഷാപ്രവർത്തനത്തിനിടെ ആംബുലൻസ് ഡ്രൈവർ അനീഷ് പാപ്പച്ചന്റെ കൈയ്ക്ക് പരിക്കേറ്റു.