പൊന്മുടി അണക്കെട്ടിൽ വള്ളം മറിഞ്ഞ് യുവാവിനെ കാണാതായി; ഫയർഫോഴ്‌സ് സഹായത്തോടെ തിരച്ചിൽ തുടരും

അടിമാലി: പൊന്മുടി അണക്കെട്ടിൽ വള്ളം മറിഞ്ഞ് യുവാവിനെ കാണാതായി. രാജാക്കാട് മമ്മട്ടിക്കാനം മുണ്ടപ്പിള്ളിൽ ശ്യാംലാൽ(28) നെയാണ് കാണാതായത്. ഇന്നലെ വൈകുന്നേരത്തോടെ സുഹൃത്തുക്കൾക്കൊപ്പം ഡാമിൽ കുളിക്കാനെത്തിയതായിരുന്നു ശ്യാംലാൽ.

കുളിക്കുന്നതിനിടെ ഇവിർ അവിടെയുണ്ടായിരുന്ന വള്ളത്തിൽ കയറി ജലാശയത്തിന്റെ മറ്റൊരു ഭാഗത്തേക്ക് പോയി. ഇതിനിടെ വള്ളം മറിയുകയായിരുന്നു. വെള്ളത്തിൽ വീണ സുഹൃത്തുക്കളായ അമലും അഭിജിത്തും നീന്തി കര കയറിയെങ്കിലും ശ്യാംലാലിനെ കണ്ടെത്താനായില്ല.

രാജാക്കാട് പൊലിസ് സ്ഥലത്തെത്തി നാട്ടുകാരുടെ സഹായത്തോടെ ജലാശയത്തിൽ തിരച്ചിൽ നടത്തിയെങ്കിലും കണ്ടെത്താനായില്ല. ഇന്ന് രാവിലെ ഫയർഫോഴ്സിന്റെ സഹായത്തോടെ തിരച്ചിൽ തുടരുമെന്ന് പൊലീസ് അറയിച്ചു.