തിരുവനന്തപുരം: അതിശക്തമായ വേനൽ മഴയ്ക്ക് പിന്നാലെ സംസ്ഥാനത്ത് കാലവർഷം രണ്ടോ മൂന്നോ ദിവസത്തിനകം എത്തിയേക്കുമെന്നു കാലാവസ്ഥാ വകുപ്പ്. നിലവിൽ തെക്കൻ തമിഴ്‌നാട് തീരത്തിനു മുകളിലായി ചക്രവാതച്ചുഴി നിലനിൽക്കുന്നുണ്ട്. തീവ്രമഴയ്ക്കു സാധ്യതയുള്ളതിനാൽ ഇന്ന് ആലപ്പുഴ, പത്തനംതിട്ട, കോട്ടയം, എറണാകുളം ജില്ലകളിൽ ഓറഞ്ച് അലർട്ട് പ്രഖ്യാപിച്ചു.

അതേസമയം, കേരളമടക്കം രാജ്യത്തു പൊതുവിൽ ഈ കാലവർഷത്തിൽ സാധാരണയിലും കനത്ത മഴ പെയ്യുമെന്നാണു കഴിഞ്ഞ ദിവസം കേന്ദ്ര കാലാവസ്ഥ വകുപ്പു പുറത്തിറക്കിയ രണ്ടാംഘട്ട മൺസൂൺ പ്രവചന റിപ്പോർട്ടിലുള്ളത്. രാജ്യമൊട്ടാകെ 106% മഴ ലഭിക്കുമെന്നാണു മുൻവർഷങ്ങളിലെ കണക്ക് അടിസ്ഥാനമാക്കിയുള്ള പ്രവചനം.