പാലക്കാട്: നെല്ലിയാമ്പതിയിൽ തേൻ എടുക്കുന്നതിനിടെ മരത്തിൽനിന്ന് വീണ് യുവാവ് മരിച്ചു. പുല്ലുകാട് ആദിവാസി കോളനിയിലെ സുരേഷാണ് (30) മരിച്ചത്. യുവാവിന്റെ മൃതദേഹവുമായി പോയ ആംബുലൻസ് മറിഞ്ഞ് നാലുപേർക്ക് പരിക്കേറ്റു. ഇവരെ ജില്ലാ ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമല്ല.

ചൊവ്വാഴ്ച രാത്രി 10 മണിയോടെ കരടിഭാഗത്ത് മരത്തിൽനിന്ന് തേൻ എടുക്കുന്നതിനിടെ സുരേഷ് വീഴുകയായിരുന്നു. വീഴ്ചയിൽ ഗുരുതരമായി പരിക്കേറ്റ സുരേഷിനെ രാത്രി 11 മണിയോടെ നെന്മാറ സാമൂഹ്യാരോഗ്യ കേന്ദ്രത്തിൽ എത്തിച്ചുവെങ്കിലും മരിച്ചു. തുടർന്ന് മൃതദേഹപരിശോധന നടത്തുന്നതിനായി ആംബുലൻസിൽ ജില്ലാ ആശുപതിയിലേക്ക് പോകുന്നതിനിടെ കൊടുവായൂരിന് സമീപം മറിഞ്ഞ് ആംബുലൻസിലുണ്ടായിരുന്ന നാലു പേർക്ക് പരിക്കേറ്റു. തുടർന്ന് കുഴൽമന്ദത്തുനിന്ന് ആംബുലൻസ് എത്തിയാണ് പരിക്കേറ്റവരെ ജില്ലാ ആശുപത്രിയിൽ പ്രവേശിപ്പിച്ചത്.

സുരേഷിന്റെ അച്ഛൻ: മയിൽ സ്വാമി. അമ്മ: സുധ. ഭാര്യ: കനക. മക്കൾ: സുജിത, കാർത്തിക, സുമിത, സുചിത്ര.