കക്കോടി കിഡ്‌നാപ്പിങ് കേസിൽ മുഖ്യപ്രതി പിടിയിൽ; പിടിയിലായത് നിരവധി ലഹരി കടത്ത് ക്രിമിനൽ കേസുകളിലെ പ്രതി
കോഴിക്കോട്: കക്കോടിയിൽ നിന്നും യുവാവിനെ തട്ടിക്കൊണ്ടു പോയ ക്വട്ടേഷൻ സംഘത്തിലെ ഒരാൾ കൂടി പൊലീസ് പിടിയിൽ. ബേപ്പൂർ പൂന്നാർ വളപ്പ് ചെരക്കോട്ട് സ്വദേശി ആട്ടി ഷാഹുൽ എന്ന ഷാഹുൽ ഹമീദ് (31) നെയാണ് കോഴിക്കോട് സിറ്റി സ്‌പെഷ്യൽ ആക്ഷൻ ഗ്രൂപ്പും ചേവായൂർ പൊലീസും ചേർന്ന് അറസ്റ്റ് ചെയ്തത്.
ഓഗസ്റ്റ് 11 ന് കക്കോടി ഗ്രാമപഞ്ചായത്ത് ഓഫീസിന് മുന്നിലത്തെ ബസ്സ് സ്റ്റോപ്പിൽ നിൽക്കുകയായിരുന്ന ബാലുശ്ശേരി ഉണ്ണികുളം സ്വദേശിയായ യുവാവിനെ ഇന്നോവയിലെത്തിയ നാലു പേർ ചേർന്ന് തട്ടിക്കൊണ്ടു പോയി ക്രൂരമായി മർദ്ദിച്ച് എടവണ്ണ പാറയിൽ ഉപേക്ഷിക്കുകയായിരുന്നു.
തുടർന്ന് ചേവായൂർ പൊലീസ് കേസ് രജിസ്റ്റർ ചെയ്യുകയും ഇൻസ്‌പെക്ടർ കെ കെ ബിജുവിന്റെ നേതൃത്വത്തിൽ അന്വേഷണം ആരംഭിക്കുകയും ചെയ്തു. തുടർന്ന് ഇന്നോവ കാർ കണ്ടെത്തുകയും വാഹനം ടൂറിനായി വാടകക്ക് കൊടുത്തതാണെന്നും മനസിലാക്കി. ഇന്നോവ വാടകക്ക് എടുത്ത സംഘത്തെ കുറിച്ച് മനസ്സിലാക്കുകയും ചെയ്തു.
പിന്നീട് പ്രതികളായ കൊണ്ടോട്ടി സ്വദേശികളായ സാലി ജമീലിനെയും മുഹമ്മദ് ഷബീറിനെയും പിടികൂടുകയും മറ്റ് രണ്ട് പേരെ കുറിച്ച് സൂചന ലഭിക്കുകയും ചെയ്തു. ഇവർക്കായി അന്വേഷണം നടത്തിയെങ്കിലും ഒരാൾ വിദേശത്തേക്ക് കടക്കുകയും ഷാഹുൽ ഒളിവിൽ കഴിയുകയുമായിരുന്നു. കഴിഞ്ഞ ദിവസം ഷാഹുൽ രാമനാട്ടുക്കര ഭാഗത്ത് ഉണ്ടെന്ന രഹസ്യവിവരം ലഭിച്ച പൊലീസ് സ്ഥലത്തെത്തിയപ്പോൾ സുഹൃത്തും നിരവധി മോഷണ ലഹരിമരുന്ന് കേസിലെ പ്രതിയായ നു ബിൻ അശോകിനൊപ്പം രഹസ്യ സങ്കേതത്തിൽ ഒളിച്ചിരുന്ന് ലഹരിമരുന്ന് ഉപയോഗിക്കുകയായിരുന്നു.
മറ്റൊരു ലഹരി മാഫിയ സംഘവുമായുള്ള ഏറ്റുമുട്ടലിൽ ഇയാളുടെ മുഖത്ത് ബ്ലേഡ് കൊണ്ടുള്ള മാരകമായ മുറിവും ഉണ്ടായിരുന്നു. വൈദ്യ പരിശോധനയിൽ നാലുതുന്നികെട്ടുകളും വേണ്ടിവന്നു. ഇവരുടെ പരാതിയിൽ ആക്രമിച്ച സംഘത്തെ പൊലീസ് അന്വേഷിച്ച് വരുന്നുണ്ട്. നു ബിൻ അശോകിനെ ഫറോക്ക് പൊലീസിൽ ഏൽപ്പിച്ചു. ഇയാൾക്ക് നിരവധി വാറണ്ട് നിലവിലുണ്ട്.ഇയാളും പൊലീസിന്റെ കണ്ണുവെട്ടിച്ച് ഒളിച്ചു നടക്കുകയായിരുന്നു.
ഷാഹുലിനെ ചോദ്യം ചെയ്തതിൽ നിന്നും ഇയാളുടെ സുഹൃത്തിന്റെ സഹോദരിക്ക് നിരന്തരം അശ്ലീല സന്ദേശം അയച്ചതിന്റെ പേരിലായിരുന്നു ക്വട്ടേഷൻ എന്നാണ് മനസിലായത്. ക്വട്ടേഷൻ ലഭിച്ച ശേഷം ഇയാളെ തട്ടിക്കൊണ്ടുപോകാൻ പലതവണ ശ്രമിച്ചെങ്കിലും കൂടെ മറ്റു ആളുകൾ ഉള്ളതിനാൽ പരാജയപ്പെടുകയായിരുന്നെന്നും പൊലീസിനോട് പറഞ്ഞു.
അന്വേഷണ സംഘത്തിൽ സ്‌പെഷ്യൽ ആക്ഷൻ ഗ്രൂപ്പ് സബ്ബ് ഇൻസ്‌പെക്ടർ ഒ.മോഹൻദാസ്,ഹാദിൽ കുന്നുമ്മൽ,ശ്രീജിത്ത് പടിയാത്ത്,സുമേഷ് ആറോളി,അർജുൻ എ.കെ, രാകേഷ് ചൈതന്യം, ചേവായൂർ പൊലീസ് സ്റ്റേഷനിലെ എഎസ്‌ഐ സജി.എം,സീനിയർ സിവിൽ പൊലീസ് ഓഫീസർമാരായ സുമേഷ് നന്മണ്ട, ശ്രീരാഗ് എസ് എന്നിവരായിരുന്നു ഉണ്ടായിരുന്നത്.
