മലപ്പുറം: അമ്പലപ്പുഴയിൽ നിന്നു കേസന്വേഷണത്തിനെത്തിയ പൊലീസ് സംഘത്തെ ആക്രമിച്ച കേസിൽ മുഖ്യപ്രതിയെ പിടികൂടി. മമ്പാട് സ്വദേശി അരഞ്ഞിക്കൽ മുസ്തഫ സേട്ടിനെ (46) യാണ് നിലമ്പൂർ സിഐ പി. വിഷ്ണുവിന്റെ നേതൃത്വത്തിലുള്ള പൊലീസ് അറസ്റ്റ് ചെയ്തത്. 2021 ൽ എറണാകുളം-അമ്പലപ്പുഴ പൊലീസ് രജിസ്റ്റർ ചെയ്ത കേസിൽ ഉൾപ്പെട്ട കെ.എൽ. 04 എ.എം. 0976 ഗ്രാന്റ് ഐടൺ കാർ മമ്പാട് തോട്ടിൻക്കര സ്വദേശി അറഞ്ഞിക്കൽ അബൂബക്കർ സിദീഖ്് (മാനു) അനധികൃതമായി കൈവശം വച്ച് നിയമവിരുദ്ധ പ്രവർത്തനങ്ങൾക്കുഉപയോഗിച്ച് വരുന്നുണ്ടെന്നു കണ്ടെത്തിയിരുന്നു. ഇക്കാര്യം അന്വേഷിക്കാനും വാഹനം കണ്ടെത്താനുമായി കഴിഞ്ഞ മാസം 17 ന് അമ്പലപ്പുഴ എസ്ഐ ജോൺസൺ പി. ജോസഫിന്റെ നേത്വത്തിൽ പൊലീസ് സംഘം മമ്പാട്ട്് എത്തിയിരുന്നു.

സിദീഖിന്റെ വീട്ടിലെത്തി വിവരം അറിയിച്ചെങ്കിലും വിദേശത്താണെന്നും വാഹനം മറ്റാർക്കോ മറിച്ചുകൊടുത്തിരിക്കയാണെന്നും സിദീഖിന്റെ ഭാര്യ അറിയിച്ചു. കേസിന്റെ ആവശ്യത്തിനു വീട് പരിശോധിക്കാൻ പൊലീസിനെ അനുവദിക്കണമെന്നാവശ്യപ്പെട്ടതു പ്രകാരം അടുത്തുതാമസിക്കുന്ന സിദീഖിന്റെ സഹോദരനെ വിളിച്ചുവരുത്തി അവരുടെ സാന്നിധ്യത്തിൽ വീട് പരിശോധിക്കാനൊരുങ്ങിയപ്പോൾ സഹോദരൻ അരഞ്ഞിക്കൽ മുസ്തഫ സേട്ടും(46) ഇദ്ദേഹത്തിനോടൊപ്പമുള്ള രണ്ടു സഹോദരന്മാരും പൊലീസിനെ തടയുകയും ഭീഷണിപ്പെടുത്തുകയും മുറിയിലിട്ട് വാതിലടക്കുകയും അസഭ്യം പറയുകയും ചെയ്തിരുന്നു.

അമ്പലപ്പുഴ പൊലീസ് അറിയിച്ചതനുസരിച്ചെത്തിയ നിലമ്പൂർ പൊലീസ് സംഘത്തെ കണ്ടുപ്രതികൾ രക്ഷപ്പെട്ടു. തുടർന്നു അമ്പലപ്പുഴ പൊലീസ് വീട് പരിശോധിച്ച് രേഖകളും വാഹനത്തിന്റെ താക്കോലുകളും കണ്ടെത്തി. ജോലി തടസപ്പെടുത്തിയതിനും മറ്റും അമ്പലപ്പുഴ എസ്‌ഐയുടെ പരാതിയിൽ നിലമ്പൂർ പൊലീസ് കേസെടുക്കുകയും ചെയ്തു. ഇതിനിടെ ഇന്നലെ മമ്പാട്ടെ വീട്ടിൽ പ്രതി മുസ്തഫ സേട്ട് എത്തിയിട്ടുണ്ടെന്നറിഞ്ഞ് സ്ഥലത്തെത്തിയ നിലമ്പൂർ സിഐ പി. വിഷ്ണു, മുസ്തഫ സേട്ടിനെ കസ്റ്റഡിയിലെടുക്കുകയായിരുന്നു. ഇയാളെ കോടതിയിൽ ഹാജരാക്കും. മറ്റു പ്രതികൾ ഒളിവിലാണ്. ഇപ്പോൾ വിദേശത്തുള്ള സിദീഖ് വർഷങ്ങളായി വാടകക്കെടുക്കുന്ന വാഹനങ്ങൾ നിസാര വിലക്ക് പണയത്തിനെടുത്ത് മറിച്ച് പണയംവയ്ക്കുന്ന പ്രധാന കണ്ണിയാണ്. പല തവണ കേരളത്തിലെ വിവിധ പൊലീസ് സ്റ്റേഷനുകളിൽ നിന്നു ഇയാളെ അന്വേഷിച്ച് പൊലീസ് മമ്പാട് എത്താറുണ്ടെന്നു പൊലീസ് അറിയിച്ചു.

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍