മലപ്പുറം: പ്രതിയെ പിടികൂടാനെത്തിയ പൊലീസുകാരെ കരിങ്കല്ല് കൊണ്ട് തലയ്ക്കിടിച്ച് കൊലപ്പെടുത്താൻ ശ്രമിച്ച കഞ്ചാവ് വിൽപ്പനക്കാരനെ അറസ്റ്റ് ചെയ്തു. മാരിയാട് ആലുങ്ങൽ മീനാട്ടുകുഴിയിൽ അബ്ദുൽ ഹക്കീം (34) ആണ് അറസ്റ്റിലായത്. മഞ്ചേരി സ്റ്റേഷനിലെ പൊലീസുകാരായ സീനിയർ സിപിഒ അനീഷ് ചാക്കോ, തൗഫീഖ് എന്നിവർക്കാണ് മർദ്ദനമേറ്റത്.
ഇന്നലെ രാവിലെ എട്ടു മണിയോടെ മഞ്ചേരി കൈരളി തിയ്യറ്ററിന് സമീപമാണ് സംഭവം. പൊലീസുകാരെ അസഭ്യം പറഞ്ഞ യുവാവിനെ പിടികൂടാൻ ശ്രമിക്കുന്നതിനിടെ അനീഷ് ചാക്കോയെ മുഖത്ത് ഇടിക്കുകയും ഇടതുകാലിനു മുട്ടിന് ചവിട്ടുകയും അടിക്കുകയും കരിങ്കല്ലു കൊണ്ട് തലക്ക് കുത്തി കൊല്ലാൻ ശ്രമിക്കുകയും ചെയ്യുകയായിരുന്നു. അക്രമത്തിൽ തൗഫീഖിന്റെ കൈക്ക് കടിയേറ്റു.
എസ്‌ഐ ബഷീർ, സിവിൽ പൊലീസ് ഓഫിസർ ലിജിൻ എന്നിവർ ചേർന്ന് നാട്ടുകാരുടെ സഹായത്തോടെയാണ് പ്രതിയെ പിടികൂടിയത്. പരിക്കേറ്റ പൊലീസുകാർ മഞ്ചേരി ഗവ. മെഡിക്കൽ കോളേജിൽ ചികിത്സ തേടി. പ്രതിയെ പിടികൂടി നടത്തിയ പരിശോധനയിൽ 150 ഗ്രാം കഞ്ചാവും 10,150 രൂപയും കണ്ടെടുത്തു. പ്രതിക്കെതിരെ മഞ്ചേരി, മലപ്പുറം, പാണ്ടിക്കാട്, മഞ്ചേരി എക്സൈസ് എന്നിവിടങ്ങളിൽ മയക്കുമരുന്ന് കേസുകൾ നിലവിലുള്ളതായി പൊലീസ് പറഞ്ഞു.
