മലപ്പുറം: ലോറിയിടിച്ച ബൈക്ക് യാത്രികൻ മരണപ്പെട്ട കേസിൽ ലോറിയും ഡ്രൈവറേയും പൊലീസ് കസ്റ്റഡിയിലെടുത്തു. യുവാവിനെ ഇടിച്ച് തെറിപ്പിച്ച് ശരീരത്തിലൂടെ ലോറിയുടെ ചക്രം കയറി ഇറങ്ങിയ ശേഷം നിർത്താതെ പോയ ലോറി കണ്ടെത്തിയത് നാടുകാണി മുതൽ മഞ്ചേരിവരെയുള്ള സി.സി.ടി.വി ദൃശ്യങ്ങൾ പരിശോധിച്ച്. അവസാനം ആന്ധ്രയിൽനിന്നും അരിയുമായിവന്ന ലോറിയും ഡ്രൈവറും പിടിയിൽ.

നിലമ്പൂർ വടപുറത്ത് ഈമാസം മൂന്നിനു പഒലർച്ചെ 1.10ഓടെയാണു കേസിനാസ്പദമായ സംഭവം നടന്നത്. ഡ്രൈവറായ ആന്ധ്രപ്രദേശ് കർണൂൽ സ്വദേശി ദസ്തഗിരി സാഹേബിനെ (45) ലോറി സഹിതമാണ് നിലമ്പൂർ സിഐ പി.വിഷ്ണു അറസ്റ്റ് ചെയ്തത്. സുഹൃത്തിന്റെ കൂടെ ബൈക്കിൽ സഞ്ചരിക്കുകയായിരുന്ന എരഞ്ഞിമങ്ങാട് സ്വദേശി ഷിനുവാണ് അപകടത്തിൽ മരണപ്പെട്ടത്. മമ്പാട് ഭാഗത്ത് നിന്നും നിലമ്പൂർ ഭാഗത്തേക്ക് ഇവർ സഞ്ചരിച്ചിരുന്ന ബൈക്കിൽ ലോറി ഇടിച്ച് ഷിനു ലോറിക്കടിയിലേക്ക് വീഴുകയും ശരീരത്തിലൂടെ ലോറിയുടെ ചക്രം കയറി ഇറങ്ങുകയും ചെയ്യുകയായിരുന്നു.

അപാകത്തെ തുടർന്നു ലോറി മഞ്ചേരി ഭാഗത്തേക്ക് നിർത്താതെ ഓടിച്ചു പോവുകയായിരുന്നു. തുടർന്നു ഇതു വഴി വന്ന ആംബുലൻസിൽ നിലമ്പൂർ ജില്ലാ ആശുപത്രിയിലെത്തിച്ചപ്പോഴേക്കും ഷിനു മരണപ്പെട്ടിരുന്നു. ബൈക്കോടിച്ച ചോക്കാട് സ്വദേശി റാഷിദ് പരിക്കേൽക്കാതെ രക്ഷപ്പെട്ടു. തുടർന്ന് കേസ്സ് രജിസ്റ്റർ ചെയ്ത പൊലീസ് നിലമ്പൂർ ഡി.വൈ.എസ്‌പി സാജു.കെ.അബ്രഹാമിന്റെ നിർദ്ദേശപ്രകാരം പ്രത്യേക അന്വേഷണ സംഘം രൂപീകരിച്ച് നാടുകാണി മുതൽ മഞ്ചേരിവരെയുള്ള സി.സി.ടി.വി ദൃശ്യങ്ങൾ പരിശോധിച്ചതിൽ നിർത്താതെ പോയ ലോറി ആന്ധ്രപ്രദേശ് രജിസ്ട്രേഷനിലുള്ളതാണെന്ന് സൂചന ലഭിച്ചിരുന്നു.

തുടർന്ന് ലോറി ഓണേഴ്സ് അസ്സോസിയേഷന്റെ സഹായത്തോടെ വാഹന ഉടമയുമായി ബന്ധപ്പെട്ട് ലോറി നിലമ്പൂരിൽ എത്തിക്കുകയായിരുന്നു. ആന്ധ്രയിൽ നിന്നും കേരളത്തിലേക്ക് അരിയുമായി എത്തിയതായിരുന്നു ലോറി. സുനിൽ.എൻ.പി, അഭിലാഷ് കൈപ്പിനി, ആഷിഫ് അലി. കെ.ടി, നിബിൻദാസ് .ടി, ജിയോ ജേക്കബ്, പ്രിൻസ്, സജേഷ് എന്നിവരും പ്രത്യേക അന്വേഷണ സംഘത്തിൽ ഉണ്ടായിരുന്നു

 

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍