ബൈക്കിൽ ടെമ്പോ ട്രാവലറിടിച്ച് യുവാവിന് ദാരുണാന്ത്യം; സിസിടിവി ദൃശ്യം പുറത്ത്; ഇടിച്ചത് കണ്ണൂരിൽ നിന്നും മലയാറ്റൂരിലേക്ക് യാത്രക്കാരുമായി പോകുകയായിരുന്നു ടെമ്പോ ട്രാവലർ; മരിച്ചത് ആലപ്പുഴക്കാരൻ

മലപ്പുറം: മലപ്പുറം ആലത്തിയൂരിൽ ടെമ്പോട്രാവലർ സ്‌കൂട്ടറിലിച്ച് യുവാവിന് ദാരുണാന്ത്യം. ഇന്നു പുലർച്ചെ മൂന്നുമണിയോടൈ ആലത്തിയൂർ ജങ്ഷനിലാണു അപകടം നടന്നത്. ചമ്രവട്ടം സ്‌നേഹപാതയിൽ ബർഗർ മേക്കറായ ആലപ്പുഴ സ്വദേശി 24വയസ്സുകാരനായ ജിഥിൻ ജെ മാത്യൂസാണ് അപകടത്തിൽ മരിച്ചത്.

അപകടത്തിന്റെ സി.സി.ടി.വി ദൃശ്യം പുറത്ത്. സ്‌കൂട്ടറിൽ റോഡ് ക്രോസ് ചെയ്യുന്നതിനിടെ അമിതവേഗതയിൽ വന്ന ടെമ്പോട്രാവലർ ജിഥിനെ ഇടിച്ച് തെറിപ്പിക്കുകയായിരുന്നു. ചമ്രവട്ടം സ്‌നേഹപാതയിലെ ബർഗ്ഗർ മേക്കറായ ജിഥിൻ, സുഹൃത്തിനെ വീട്ടിൽ കൊണ്ട് വിട്ട് താമസ കേന്ദ്രത്തിലേക്ക് പോകുകയായിരുന്നു. മംഗലം റോഡിൽ നിന്ന് ജങ്ഷനിലേക്ക് പ്രവേശിച്ചതിന് പിന്നാലെയായിരുന്നു അപകടം.

കണ്ണൂരിൽ നിന്നും മലയാറ്റൂരിലേക്ക് യാത്രക്കാരുമായി പോകുകയായിരുന്നു ടെമ്പോട്രാവലർ. അപകടം നടന്നയുടൻ ജിഥിനെ ആലത്തിയൂരിലെ ഇമ്പിച്ചിബാവ സഹകരണ ആശുപത്രിയിലെത്തിച്ച ശേഷം കോഴിക്കോട് മെഡിക്കൽ കോളേജിലേക്ക് കൊണ്ടുപോയെങ്കിലും യാത്രക്കിടെ മരണപ്പെടുകയായിരുന്നു.