കോടിയേരിയുടെ ജീവൻ തുടിക്കുന്ന ശിൽപം വീട്ടുമുറ്റത്തെത്തി; ഇരുകൈകളും ചേർത്ത് പിടിച്ച് വിങ്ങിക്കരഞ്ഞ് വിനോദിനി

തിരുവനന്തപുരം: ജീവൻ തുടിക്കുന്ന ശിൽപമായി കോടിയേരി ബാലകൃഷ്ണൻ വീട്ടുമുറ്റത്തെത്തി. ശിൽപി സുനിൽ കണ്ടല്ലൂർ നിർമ്മിച്ച ശിൽപം വീട്ടുമുറ്റത്തെത്തിയപ്പോൾ വികാര നിർഭരമായ രംഗങ്ങളാണ് അരങ്ങേറിയത്. വീട്ടിൽനിന്നിറങ്ങാൻ നേരം പതിവുപോലെ സഖാവിന്റെ കയ്യിൽ പിടിച്ചു യാത്രയാക്കുന്നതുപോലെ വിനോദിനി, കോടിയേരിയുടെ വലതു കൈയിൽ തന്റെ ഇരുകൈകളും ചേർത്തുപിടിച്ചു. ഒരു നിമിഷം, മുഖത്തെ സങ്കടം വിങ്ങിക്കരച്ചിലായി മാറി.

മകൻ ബിനീഷ് കോടിയേരിയും ഭാര്യ റിനീറ്റയും അച്ഛന്റെ ഓർമയിൽ കൈപ്പടം നെഞ്ചോടു ചേർത്തു. ആറു മാസമെടുത്താണു ശിൽപി സുനിൽ കണ്ടല്ലൂർ, അന്തരിച്ച സിപിഎം സംസ്ഥാന സെക്രട്ടറിയും മുൻ മന്ത്രിയുമായ കോടിയേരി ബാലകൃഷ്ണന്റെ ശിൽപം പൂർത്താക്കിയത്. കോടിയേരിയുടെ അതേ ഉയരത്തിലും ഭാരത്തിലുമുള്ള പൂർണകായ ശിൽപമാണു നിർമ്മിച്ചിരിക്കുന്നത്. തിരുവനന്തപുരത്തെ മെഴുകു മ്യൂസിയത്തിൽ ശിൽപം സ്ഥാപിക്കും.