റോഡിൽ തെറിച്ച് വീണ കിരണിന്റെ ശരീരത്തിലൂടെ വാൻ കയറിയിറങ്ങി; ആശുപത്രിയിലേക്ക് കൊണ്ടു പോകും വഴി രണ്ടാമനും മരിച്ചു; ചവറയിൽ ഇൻസുലേറ്റഡ് വാൻ ബൈക്കുമായി കൂട്ടിയിടിച്ചുണ്ടായ അപകടത്തിൽ മരിച്ചവരുടെ സംസ്‌ക്കാരം ഇന്ന്
ചവറ: ദേശീയപാതയിൽ ചവറ ബസ് സ്റ്റാൻഡിനു സമീപം ഇന്നലെ രാത്രിയുണ്ടായ അപകടത്തിൽ മരിച്ചവരുടെ സംസ്‌ക്കാരം ഇന്ന്. ഇൻസുലേറ്റഡ് വാൻ ബൈക്കുമായി കൂട്ടിയിടിച്ചുണ്ടായ അപകടത്തിൽ വസ്ത്ര വ്യാപാര ശാല ഉടമയടക്കം രണ്ടുപേരാണ് മരിച്ചത്. ചവറ കൊറ്റൻകുളങ്ങര ജംക്ഷനിൽ വസ്ത്രവ്യാപാര ശാല നടത്തുന്ന കരുനാഗപ്പള്ളി പടനായർകുളങ്ങര തെക്ക് കൈതവാരത്ത് (രാരീരം) വീട്ടിൽ കിരൺരാജ് (48), ചവറ പുതുക്കാട് കൃഷ്ണാലയത്തിൽ രാധാകൃഷ്ണൻ (52) എന്നിവരാണ് മരിച്ചത്.
ഇന്നലെ രാത്രി 7.30 ന് ദേശീയപാതയിൽ ചവറ ബസ് സ്റ്റാൻഡിനു സമീപമായിരുന്നു അപകടം. പാൽ കയറ്റി കൊല്ലം ഭാഗത്തേക്ക് പോകുകയായിരുന്ന ഇൻസുലേറ്റഡ് വാനും ബൈക്കും തമ്മിൽ കൂട്ടിയിടിക്കുകയായിരുന്നു. റോഡിൽ തെറിച്ച് വീണ കിരണിന്റെ ശരീരത്തിലൂടെ വാൻ കയറിയിറങ്ങി. തൽക്ഷണം മരിച്ചു. ജില്ലാ ആശുപത്രിയിലേക്ക് കൊണ്ടുപോകും വഴി രാധാകൃഷ്ണനും മരണത്തിന് കീഴടങ്ങി.
സൗമ്യയാണ് കിരണിന്റെ ഭാര്യ. മകൻ: അപ്പു കിരൺ. രാധാകൃഷ്ണന്റെ ഭാര്യ മഞ്ജു (ആശ വർക്കർ ചവറ ഗ്രാമപഞ്ചായത്ത്). മക്കൾ: ഹരികൃഷ്ണൻ, യദുകൃഷ്ണൻ. ഇരുവരുടെയും സംസ്‌കാരം ഇന്ന് നടക്കും.
