ആറന്മുള വള്ളസദ്യയ്ക്ക് ഇന്നു തുടക്കം; ആദ്യദിവസം വള്ളസദ്യ നൽകുന്നത് പത്ത് പള്ളിയോടങ്ങൾക്ക്

ആറന്മുള: ആറന്മുള പാർഥസാരഥിയുടെ ഇഷ്ടവഴിപാടായ വള്ളസദ്യയ്ക്ക് ഇന്നു തുടക്കം. ഉദ്ഘാടനം രാവിലെ 11.30ന് ക്ഷേത്രാങ്കണത്തിൽ എൻഎസ്എസ് പ്രസിഡന്റ് ഡോ. എം. ശശികുമാർ നിർവഹിക്കും. ആദ്യദിവസം 10 പള്ളിയോടങ്ങൾക്കാണ് വള്ളസദ്യ .ഒക്ടോബർ രണ്ടുവരെ വള്ളസദ്യ നടക്കും. അഭീഷ്ടകാര്യ സിദ്ദിഖാണ് ഭക്തർ വള്ളസദ്യ വഴിപാട് നടത്തുന്നത്.

പള്ളിയോടത്തിൽ എത്തുന്നവരോടൊപ്പം അന്നദാനപ്രഭുവായ തിരുവാറന്മുളയപ്പനും ഉണ്ടാകുമെന്നാണ് വിശ്വാസം. 52 കരകളിൽ നിന്നുള്ള പള്ളിയോടങ്ങൾ പല ദിവസങ്ങളിലായി തിരുവാറന്മുളയപ്പനെ കാണാനെത്തും. ഇലയിൽ വിളമ്പുന്ന 44 വിഭവങ്ങൾക്ക് പുറമേ പാടിച്ചോദിക്കുന്ന ഇരുപതും ഉൾപ്പെടെ 64 വിഭവങ്ങളാണ് വള്ളസദ്യയിൽ വിളമ്പുന്നത്. പള്ളിയോടങ്ങളിലെത്തുന്ന കരക്കാർക്ക് ആതിഥ്യമരുളിയാണ് ക്ഷേത്രത്തിലേക്ക് ആനയിക്കുക. ആചാരനുഷ്ഠാനങ്ങളുടെ പ്രൗഢിയിലാണ് ചടങ്ങുകൾ.