കണ്ണൂർ സെൻട്രൽ ജയിലിലേക്ക് ഹാഷിഷ് ഓയിലും ബീഡിയും; യുവാവ് അറസ്റ്റിൽ

കണ്ണൂർ:  കണ്ണൂർ സെൻട്രൽ ജയിലിൽ സുഹൃത്തിനെ കാണാനെത്തിയ യുവാവിൽ നിന്നും ഹാഷിഷ് ഓയിലും ബീഡിയും പിടികൂടി. കക്കാട് സ്വദേശി സി.പി സജീറിന്റെ(24) കൈയിൽ നിന്നാണ് 2.15-ഗ്രാം ഹാഷിഷ് ഓയിലും 40-കെട്ടു ബീഡിയും നാലു ലൈറ്ററും പിടികൂടിയത്.

വ്യാഴാഴ്‌ച്ച ഉച്ചയ്ക്ക് പന്ത്രണ്ടുമണിയോടെയാണ് സംഭവം. സെൻട്രൽ ജയിലിലെ തടവുകാരനായ സുഹൃത്തിനെ കാണാനെത്തിയ സജീറിന്റെ പെരുമാറ്റത്തിൽ സംശയം തോന്നിയ ജയിൽ അധികൃതർ പരിശോധിച്ചപ്പോഴാണ് ഹാഷിഷ് ഓയിലും ബീഡിയും കണ്ടെത്തിയത്. തുടർന്ന് സൂപ്രണ്ട് കണ്ണൂർ ടൗൺ പൊലിസ് സ്റ്റേഷനിൽ പരാതി നൽകുകയായിരുന്നു. കണ്ണൂർ ടൗൺ പൊലിസെത്തി യുവാവിനെ അറസ്റ്റു ചെയ്തു കണ്ണൂർ കോടതിയിൽ ഹാജരാക്കി റിമാൻഡ് ചെയ്തു.