വെഞ്ഞാറമൂട്ടിൽ അയ്യപ്പഭക്തർ സഞ്ചരിച്ച കാർ കടയിലേക്ക് ഇടിച്ചുകയറി കടയുടമ മരിച്ചു

തിരുവനന്തപുരം: വെഞ്ഞാറമൂട്ടിൽ അയ്യപ്പഭക്തർ സഞ്ചരിച്ച കാർ കടയിലേക്ക് ഇടിച്ചുകയറിയുണ്ടായ അപകടത്തിൽ കടയുടമക്ക് ദാരുണാന്ത്യം. ആലിയാട് സ്വദേശി രമേശൻ (45) ആണ് മരിച്ചത്.

ആന്ധ്രാപ്രദേശ് സ്വദേശികളാണ് കാറിലുണ്ടായിരുന്നത്. വെഞ്ഞാറമൂട് തണ്ടാംപൊയ്ക ജങ്ഷനു സമീപം ഇന്ന് പുലർച്ചെ 4.45-നാണ് അപകടം നടന്നത്. കാരേറ്റ് ഭാഗത്തു നിന്ന് തിരുവനന്തപുരത്തേക്ക് വരികയായിരുന്ന എ.പി 39 ആർ.എൽ 9990 നമ്പരിലുള്ള കാറാണ് അപകടത്തിൽപ്പെട്ടത്.

കാർ ജങ്ഷനിലെ നെസ്റ്റ് ബേക്കറി എന്ന കടയിലേക്കാണ് പാഞ്ഞുകയറിയത്. കാർ യാത്രക്കാരായ ആന്ധ്രാ സ്വദേശികളുടെ പരുക്ക് ഗുരുതരമല്ല. എല്ലാവരും ഗോകുലം മെഡിക്കൽ കോളേജ് ആശുപത്രിയിൽ ചികിത്സയിലാണ്.