നിയന്ത്രണംവിട്ട കെഎസ്ആർടിസി സ്വിഫ്റ്റ് ബസ് ഇടിച്ചു; നിരവധി പേർക്ക് പരിക്ക്

കൊച്ചി: ഡ്രൈവർക്ക് തലകറക്കമുണ്ടായതിനെ തുടർന്ന് നിയന്ത്രണംവിട്ട കെഎസ്ആർടിസി സ്വിഫ്റ്റ് ബസ് ഇടിച്ച് നിരവധി പേർക്ക് പരിക്കേറ്റു. സിഗ്‌നലിൽ നിർത്തിയിട്ടിരുന്ന ബസ് ഇടിച്ചാണ് അപകടമുണ്ടായത്. അരൂർ ബൈപാസ് കവലയിൽ വൈകിട്ട് 6.30-നായിരുന്നു അപകടം. അഞ്ച് വാഹനങ്ങൾക്ക് പിന്നിലേക്ക് ബസ് ഇടിച്ചു കയറുകയായിരുന്നു.

സിഗ്‌നലിൽ നിർത്തിയിട്ടിരുന്ന വിവിധ വാഹനങ്ങളിലുണ്ടായിരുന്ന 12 പേർക്കാണ് പരിക്കേറ്റത്. ഒരാളുടെ പരിക്ക് ഗുരുതരമാണ്. കോതമംഗലത്ത് നിന്ന് തിരുവനന്തപുരത്തേക്ക് പോകുകയായിരുന്ന കെഎസ്ആർടിസി സ്വിഫ്റ്റ് ബസ് സിഗ്‌നലിൽ നിന്ന ബൈക്ക് യാത്രികനെയാണ് ആദ്യം ഇടിച്ചു വീഴ്‌ത്തിയത്.

തുടർന്ന് മുന്നിലുണ്ടായിരുന്ന രണ്ട് കാറുകളിലും എറണാകുളത്ത് നിന്നും ചേർത്തലയിലേക്ക് പോകുകയായിരുന്ന സ്വകാര്യ ബസിന് പിന്നിലും ഇടിക്കുകയായിരുന്നു. ഇടിയുടെ ആഘാതത്തിൽ ഒരു കാർ പൂർണമായും തകർന്നു.