നവ കേരള സദസ്സിനിടെ വ്‌ലോഗറെ കയ്യേറ്റം ചെയ്ത കേസിൽ 11 ഡിവൈഎഫ്ഐ പ്രവർത്തകർ അറസ്റ്റിൽ
മലപ്പുറം: മലപ്പുറത്ത് ഏറനാട് മണ്ഡലം നവകേരള സദസ്സിനിടെ വ്‌ലോഗറെ കയ്യേറ്റം ചെയ്ത കേസിൽ 11 ഡിവൈഎഫ്ഐ പ്രവർത്തകരെ അരീക്കോട് പൊലീസ് അറസ്റ്റ് ചെയ്തു. ഡിവൈഎഫ്ഐ അരീക്കോട് ബ്ലോക്ക് പ്രസിഡന്റ് ഉൾപ്പെടെയുള്ളവരാണ് അറസ്റ്റിലായത്. മർദ്ദനം, തടഞ്ഞുവയ്ക്കൽ തുടങ്ങിയ വകുപ്പുകൾ ചുമത്തിയാണ് ഇവരെ അറസ്റ്റ് ചെയ്തത്.
നവ കേരള സദസ്സിസിൽ പരാതി നൽകാൻ എത്തിയതായിരുന്നു വ്‌ലോഗറായ കുഴിമണ്ണ സ്വദേശി നിസാർ. നികുതി വർദ്ധനയിൽ പ്രതിഷേധിച്ച് സർക്കാരിനെ വിമർശിച്ച് നിസാർ നേരത്തെ വീഡിയോ ചെയ്തിരുന്നു. ഇതിലുള്ള അമർഷമാണ് മർദ്ദനത്തിന് കാരണമെന്നാണ് നിഗമനം.
കഴിഞ്ഞമാസം 30ന് അരീക്കോട് നടന്ന ഏറനാട് മണ്ഡലം നവകേരള സദസ്സിനിടെയായിരുന്നു യു ട്യൂബറായ നിസാർ കുഴിമണ്ണയെ ഡിവൈഎഫ്ഐ പ്രവർത്തകർ വളഞ്ഞിട്ട് മർദ്ദിച്ചത്. ഡിവൈഎഫ്ഐ അരീക്കോട് ബ്ലോക്ക് പ്രസിഡന്റ് സാദിൽ, പ്രവർത്തകരായ കെ സൽമാൻ, എൻ.കെ അബ്ദുൽ ഗഫൂർ, ഉബൈദുല്ല ശാക്കിർ, കെ.വി ശ്രീജേഷ്, ടി.സി അബ്ദുൽ നാസർ, നസീർ പള്ളിയാലി, എസ് ജിനേഷ്, എംകെ മുഹമ്മദ് അനീസ്, മുഹമ്മദ് അഷ്റഫ്, പി സയ്യിദ് ആബിദ് എന്നിവരാണ് അറസ്റ്റിലായത്.
നിസാറിന്റെ പരാതിയിൽ പൊലീസ് കേസ്സെടുത്ത് അന്വേഷണം തുടങ്ങിയെങ്കിലും 20 ദിവസത്തിന് ശേഷം പ്രതികൾ പൊലീസ് സ്റ്റേഷനിൽ ഹാജരാകുകയായിരുന്നു. നിസാറിന്റെ കയ്യിൽ നിന്ന് പിടിച്ചെടുത്ത മൊബൈൽഫോണും മൈക്കും ഉൾപ്പെടെയുള്ള വസ്തുക്കൾ കണ്ടെടുക്കാനുണ്ട്.
