കോഴിക്കോട്: കോഴിക്കോട് കാക്കൂർ പൊലീസ് സ്റ്റേഷനിലെ എസ്ഐക്കും പൊലീസുകാർക്കും നേരെ നടന്ന ആക്രമണത്തിൽ നാലു പേർ പിടിയിൽ. ഇന്നലെ രാത്രി പത്തരയോടെ ചേളന്നൂരിൽ വച്ചായിരുന്നു ആക്രമണം.
സുബിൻ, ബിജീഷ്, അതുൽ, അജേഷ് എന്നിവരാണ് അറസ്റ്റിലായത്. പിടിയിലായവരെല്ലാം ചേളന്നൂർ സ്വദേശികളാണ്. പൊലീസുകാരെ ആക്രമിക്കുക, ഔദ്യോഗിക കൃത്യനിർവഹണം തടസ്സപ്പെടുത്തുക തുടങ്ങിയ വകുപ്പുകൾ ഇവർക്കെതിരെ ചുമത്തിയിട്ടുണ്ട്.
ചേളന്നൂരിൽ കുട്ടികൾ കരോൾ നടത്തിയിരുന്നു. അതിനിടെ ഒരു സംഘം യുവാക്കൾ വാഹനങ്ങൾ തടഞ്ഞ് പണപ്പിരിവ് നടത്തുന്നതായി പൊലീസിന് വിവരം ലഭിച്ചു. തുടർന്നാണ് എസ്ഐ അബ്ദുൾ സലാമിന്റെ നേതൃത്വത്തിൽ പൊലീസ് സംഘം സ്ഥലത്തെത്തുന്നത്.
വാഹനം തടഞ്ഞവരെ കസ്റ്റഡിയിലെടുക്കുമ്പോഴായിരുന്നു പൊലീസിന് നേർക്ക് ആക്രമണം ഉണ്ടായത്. എസ്ഐ അബ്ദുൾ സലാം, സീനിയർ സിവിൽ പൊലീസ് ഓഫീസർ രജീഷ്, ഡ്രൈവർ ജിജു എന്നിവർക്കാണ് പരിക്കേറ്റത്. അക്രമത്തിൽ പൊലീസ് ജീപ്പിന് സാരമായി കേടുപാടുകൾ സംഭവിച്ചിട്ടുണ്ട്.
