കോട്ടയം: കുറവിലങ്ങാട് കളത്തൂർ കാണക്കാരി റോഡിൽ മണ്ഡപ പടിക്കു സമീപം കാർ പാറമടകുളത്തിൽ വീണ് യുവാവ് മരിച്ചു. കോട്ടയം ഗാന്ധിനഗർ ബിവറേജിന് സമീപം കട നടത്തുന്ന കുറുപ്പന്തറ കൊണ്ടുക്കാലാ ഞാറുകുളത്തേൽ കിണറ്റുങ്കൽ ലിതീഷ് ജോസ് (45) ആണ് മരിച്ചത്.

ഇന്നലെ രാത്രി 10.30 ഓടെ ലിതീഷ് കട അടച്ചശേഷം വീട്ടിലേക്ക് പോകുന്ന വഴി കാർ നിയന്ത്രണം തെറ്റി പാറമടയിലേക്ക് വീഴുകയായിരുന്നു എന്നാണ് വിലയിരുത്തൽ. ഇന്നു പുലർച്ചെയാണ് സമീപവാസികൾ സംഭവം അറിഞ്ഞത്. കടുത്തുരുത്തി അഗ്‌നിരക്ഷാസേനയെത്തി മൃതദേഹം പുറത്തെടുത്തു.

ഇന്ന് രാവിലെയാണ് പ്രദേശവാസികൾ പാറക്കുളത്തിൽ കാർ കണ്ടെത്തിയത്. കാറിന്റെ ഒരു ഭാഗം വെള്ളത്തിൽ ഉയർന്നു നിൽക്കുന്ന നിലയിലായിരുന്നു. ഇതു കണ്ട നാട്ടുകാരാണ് പൊലീസിൽ വിവരമറിയിച്ചത്. കോട്ടയം മെഡിക്കൽ കോളേജിന് അടുത്ത് സ്ഥാപനം നടത്തുന്ന ലീജീഷ് ഇന്നലെ രാത്രി കടയടച്ച് വരുന്നതിനിടെ അപകടത്തിൽ പെടുകയായിരുന്നുവെന്നാണ് നിഗമനം.

കാർ തെന്നി കുളത്തിലേക്ക് മറിഞ്ഞതിന്റെ പാടുകൾ പ്രദേശത്തു നിന്നും പൊലീസ് കണ്ടെത്തിയിട്ടുണ്ട്. വിവരമറിഞ്ഞെത്തിയ പൊലീസ് ക്രെയിനിന്റെ സഹായത്തോടെ ഏറെ പാടുപെട്ടാണ് വാഹനം കരയ്‌ക്കെത്തിച്ചത്.

അപകടമരണം തന്നെയാണോ, ആരെങ്കിലും അപായപ്പെടുത്തിയതാണോ എന്നത് അന്വേഷിക്കുമെന്ന് പൊലീസ് വ്യക്തമാക്കി. യുവാവിന്റെ മൃതദേഹം പോസ്റ്റുമോർട്ടത്തിനായി കോട്ടയം മെഡിക്കൽ കോളേജിലേക്ക് മാറ്റി.

 

കുറവിലങ്ങാട് കാർ പാറമടകുളത്തിൽ വീണ് യുവാവ് മരിച്ചു