പത്തനംതിട്ട: പഞ്ചായത്ത് അംഗത്തിന്റെ വീട്ടുമുറ്റത്തേക്ക് പെരുമ്പാമ്പിനെ ചാക്കിൽ കെട്ടിയെറിഞ്ഞെന്ന് പരാതിയിൽ അന്വേഷണത്തിന് പൊലീസ്. പത്തനംതിട്ട ചെന്നീർക്കരയിലാണ് സംഭവം. ബിന്ദു ടി ചാക്കോയുടെ വീട്ടുമുറ്റത്തേക്കാണ് പെരുമ്പാമ്പിനെ ചാക്കിൽ കെട്ടിയെറിഞ്ഞത്. ആരാണ് ഇതിന് പിന്നിലെന്ന് കണ്ടെത്താനുള്ള ശ്രമത്തിലാണ് പൊലീസ്.
വ്യാഴാഴ്ച രാത്രി പ്രദേശത്ത് നിന്ന് പെരുമ്പാമ്പിനെ കണ്ടെത്തിയതായി നാട്ടുകാർ പഞ്ചായത്ത് അംഗത്തിനെ വിളിച്ചറിയിച്ചു. ഉടനെ തന്നെ ബിന്ദു ടി ചാക്കോ വനം വകുപ്പിനെ വിവരം അറിയിച്ചു. വനം വകുപ്പ് അധികൃതർ പ്രദേശത്തെത്തിയപ്പോൾ പെരുമ്പാമ്പിനെ കണ്ടെത്തനാവത്തതിനെ തുടർന്ന് പഞ്ചായത്ത് അംഗത്തിനെ ഫോണിൽ ബന്ധപ്പെട്ടു.
പിന്നീട് നാട്ടുകാരെ വിളിച്ചപ്പോഴാണ് ആരോ പാമ്പിനെ ചാക്കിലാക്കി തന്റെ വീടിന് മുന്നിൽ ഉപേക്ഷിച്ച വിവരം പഞ്ചായത്ത് അംഗം അറിയുന്നത്. തുടർന്ന് വനം വകുപ്പ് അധികൃതർ മെമ്പറുടെ വീട്ടിലെത്തി പെരുമ്പാമ്പിനെ പിടികൂടി. സംഭവത്തിൽ ഇലവുതിട്ട പൊലീസിൽ പരാതി നൽകിയിട്ടുണ്ട്. സംഭവ സമയം സ്ത്രീകൾ മാത്രമാണ് വീട്ടിലുണ്ടായിരുന്നതെന്ന് പരാതിയിൽ പറയുന്നു.
