കോട്ടയം: കണ്ണൂരിൽ നിന്നും കുടുംബാംഗങ്ങളോടെപ്പം വിനോദസഞ്ചാരത്തിനെത്തിയ ഏഴു വയസ്സുകാരൻ മീൻകുളത്തിൽ വീണു മരിച്ചു. കോട്ടയം നീണ്ടൂരിലെ ഫാം സന്ദർശനത്തിലൂടെ അബദ്ധത്തിൽ കുളത്തിൽ വീണാണ് അപകടം. കണ്ണൂർ ഇരിട്ടിക്കടുത്ത് പായം പഞ്ചായത്തിലെ കുന്നോത്ത് കേളൻപീടിക പാലക്കാട്ട് കിള്ളിയാത്ത് സിജോയുടെ മകൻ ഐഡൻ ജൂഡ് ജോർജ് ആണ് ഇന്നലെ വൈകിട്ട് മരിച്ചത്.
നീണ്ടൂർ ജെഎസ് (ചെമ്മാച്ചേൽ) ഫാം സന്ദർശനത്തിനിടെ വൈകിട്ട് ആറുമണിയോടെയാണ് സംഭവം. കുടുംബസമേതം വിനോദസഞ്ചാരത്തിനെത്തിയതായിരുന്നു 7 അംഗസംഘം. ഫാമിലെ സന്ദർശനത്തിനു ശേഷം തിരികെപ്പോകാൻ തുടങ്ങുമ്പോഴാണ് കുട്ടി അബദ്ധത്തിൽ വെള്ളത്തിൽ വീണത്. ഉടൻ തന്നെ കുട്ടിയെ കോട്ടയം മെഡിക്കൽ കോളജിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. സംഭവത്തിൽ ഏറ്റുമാനൂർ പൊലീസ് മേൽനടപടികൾ സ്വീകരിച്ചു. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ.
എറണാകുളം, ആലപ്പുഴ തുടങ്ങിയ സ്ഥലങ്ങളിൽ സന്ദർശനം നടത്തിയ ശേഷം ബോട്ട് മാർഗമാണ് ഇന്നലെ ഉച്ചയോടെ ഇവർ കോട്ടയം കോടിമതയിൽ എത്തിയത്. തുടർന്നാണ് നീണ്ടൂരിലെ ഫാം സന്ദർശിച്ചത്. പിതാവ് സിജോ നേരത്തേ ഗൾഫിലായിരുന്നു. ഭാര്യ ന്യൂസീലൻഡിലേക്കു പോയതിനെത്തുടർന്നു ജോലി രാജിവച്ചു നാട്ടിൽ എത്തി മക്കളുടെ ഒപ്പം കഴിയുകയായിരുന്നു സിജോ.
യാത്രയിൽ കുട്ടിയുടെ പിതാവും അമ്മാവൻ ഷൈനും ഉൾപ്പെടെയുള്ളവരാണ് ഉണ്ടായിരുന്നത്. അമ്മ ന്യൂസീലൻഡിൽ ജോലിസ്ഥലത്താണ്. അമ്മ: ഷെറിൻ (ന്യൂസീലൻഡ്). സഹോദരങ്ങൾ: അഡ്രിയേൽ, ഐയ്‌സാ.
