ഓറിയോൾ അക്കാദമി ലേസർ സർജറി പരിശീലന പ്രോഗ്രാം സംഘടിപ്പിച്ചു

കൊച്ചി: ഓറിയോൾ അക്കാദമിയും കൊച്ചി ഫ്യൂച്ചറീസ് ആശുപത്രിയും സംയുക്തമായി സംഘടിപ്പിച്ച ദ്വിദിന ലേസർ സർജറി പ്രോഗ്രാം കൊച്ചിയിൽ നടന്നു. പൈൽസ്, ഫിസ്റ്റുല, ഫിഷർ രോഗങ്ങളുള്ള അഞ്ചിലേറെ രോഗികളിൽ വിജയകരമായി ബയോ ലേസർ ശസ്ത്രക്രിയ നടത്തി. ഇന്ത്യയിലെ വിവിധ സംസ്ഥാനങ്ങളിൽ നിന്ന് തെരഞ്ഞെടുക്കപ്പെട്ട പത്തിലേറെ സർജന്മാർക്കൊപ്പം ലോകത്തിലെ 40ലേറെ രാജ്യങ്ങളിൽ നിന്നുള്ള വിദഗ്ധ സർജന്മാർ ഓൺലൈനായി പങ്കെടുത്തു.

പ്രോക്ടോളജി (പൈൽസ്, ഫിസ്റ്റുല, ഫിഷർ രോഗങ്ങൾ സംബന്ധിച്ച മെഡിക്കൽ ശാഖ) ലേസർ സർജറിയിൽ ലോകപ്രശസ്ത പരിശീലകനും ഡൽഹിയിലെ മാക്‌സ് ആശുപത്രി സർജറി മേധാവിയുമായ ഡോ. നീരജ് ഗോയൽ, എറണാകുളം ലേക്ഷോർ ആശുപത്രി സർജറി വിഭാഗം മേധാവിയും കീ ഹോൾ ക്ലിനിക് മാനേജിങ് ഡയറക്ടറുമായ ഡോ. പത്മകുമാർ, ഡോക്ടർമാരായ ഡോ. മധുകർ പൈ, ഡോ. റെൻസിൻ എന്നിവരുടെ നേതൃത്വത്തിലാണ് ലേസർ സർജറി പരിശീലന പ്രോഗ്രാം നടന്നത്. ആധുനിക മെഡിക്കൽ വിഭാഗത്തിലെ ഏറ്റവും നൂതനമായ പരിശീലന പരിപാടികൾക്കാണ് രണ്ട് ദിവസങ്ങളിലായി പങ്കെടുത്തതെന്ന് വിവിധ ഡോക്ടർമാർ അഭിപ്രായപ്പെട്ടു.

ഓറിയോൾ അക്കാദമി സിഇഒ പ്രവീൺ നൈറ്റും എക്‌സിക്യൂട്ടീവ് ഡയറക്ടർ അമൽ എ.കെയും ചേർന്ന് പരിശീലനാർത്ഥികൾക്ക് ബയോ ലേസർ സാങ്കേതിക വിദ്യ പരിചയപ്പെടുത്തുകയും പരിശീലനം നൽകുകയും ചെയ്തു. ഫ്യൂച്ചറീസ് ഹോസ്പിറ്റൽ ജനറൽ മാനേജർ ഷിയാസ്, ഓറിയോൾ അക്കാദമി സി.ഒ.ഒ നീലിമ ജോസഫ് എന്നിവരും പ്രോഗ്രാമിൽപങ്കെടുത്തു