ഇരിട്ടി: പുന്നാട് കോട്ടത്തെകുന്നിൽ വീട്ടിലുണ്ടായ സ്‌ഫോടനത്തിൽ ദമ്പതികൾക്ക് പരിക്കേറ്റു. കോട്ടത്തെക്കുന്ന് കല്ലിക്കണ്ടി സുഭാഷ് (43), ഭാര്യ പാർവതി (36) എന്നിവർക്കാണ് പരിക്കേറ്റത്. ഇവരെ ഇരിട്ടി താലൂക്ക് ആശുപത്രിയിൽ പ്രവേശിപ്പിച്ചു.

ഞായറാഴ്ച ഉച്ചയോടെയാണ് ഇവരുടെ വീട്ടിൽ വൻ ശബ്ദത്തോടെ വീട്ടിൽ സ്‌ഫോടനമുണ്ടായതെന്ന് പ്രദേശവാസികൾ പറഞ്ഞു. സുഭാഷിന്റെ ഇരു കാലുകൾക്കും ദേഹത്തും ഉൾപ്പെടെ പരിക്ക് പറ്റിയിട്ടുണ്ട്. ഭാര്യക്ക് വയറിലാണ് പരിക്ക്. സ്‌ഫോടകവസ്തു നിലത്തുവീണ് പൊട്ടിയതാണെന്നാണ് നിഗമനം.

കാട്ടുപന്നിയെ പിടികൂടാനായി കെട്ടിയ പന്നിപ്പടക്കം താഴെവീണ് പൊട്ടിയതാണെന്നാണ് സുഭാഷ് പൊലീസിന് നൽകിയ മൊഴി. എന്നാൽ നാടൻബോംബ് പൊട്ടിയാണ് സ്‌ഫോടനമെന്നാണ് എഫ്.ഐ.ആറിൽ രേഖപ്പെടുത്തിയിട്ടുള്ളത്. ഇരിട്ടി പൊലീസ് സ്ഥലത്തെത്തി പരിശോധന നടത്തി .