പത്തനംതിട്ട: ധർമ്മ ശാസ്താവിനെ കൺനിറയെ കണ്ട് കൈ തൊഴുത് സന്നിധാനത്ത് എത്തിയ 103 വയസുള്ള മധുര സ്വദേശി ഷൺമുഖ അമ്മാൾ. നിനച്ചിരിക്കാതെയാണ് ഷൺമുഖ അമ്മാളിന് അയ്യനെ അടുത്ത് നിന്നും കൺനിറയെ കാണാൻ അവസരം ഒരുങ്ങിയത്. ഇതിന് അവസരമൊരുക്കിയതാവട്ടെ ദേവസ്വം മന്ത്രി കെ രാധാകൃഷ്ണനും.

ചൊവ്വാഴ്ച പകൽ പന്ത്രണ്ടോടെ സന്നിധാനത്തെത്തിയ ഷൺമുഖ അമ്മാൾ കൂട്ടം തെറ്റിയതിനെ തുടർന്ന് ഒപ്പമുണ്ടായിരുന്ന മറ്റുള്ളവരെ തേടി നടക്കുമ്പോഴാണ് മന്ത്രിയുടെ ശ്രദ്ധയിൽപ്പെട്ടത്. അരികിലെത്തി വിവരം ചോദിച്ച് അറിഞ്ഞ മന്ത്രി ഇവർക്ക് ദർശനത്തിന് പ്രത്യേക സൗകര്യം ഒരുക്കി നൽകി. പിന്നീട് ബന്ധുക്കൾ അന്വേഷിച്ചു വരുന്നതു വരെ ഷൺമുഖ അമ്മാളിനെ എക്‌സിക്യൂട്ടീവ് ഓഫീസറുടെ ഓഫീസിനടുത്ത് ഇരുത്തി.

അയ്യപ്പൻ മന്ത്രിയുടെ രൂപത്തിലെത്തിയതു കൊണ്ട് മികച്ച ദർശനം കിട്ടിയെന്ന് ഷൺമുഖ അമ്മാൾ പറഞ്ഞു. പിന്നീട് പൊലീസ് ബന്ധുക്കളെ കണ്ടെത്തി അമ്മാളിനെ അവരുടെ സുരക്ഷിത കരങ്ങളിൽ ഏൽപ്പിച്ചു.