കണ്ണൂർ: സംസ്ഥാന ബഡ്സ് കലോത്സവം 'തില്ലാന' 20, 21 തീയതികളിൽ തലശ്ശേരി ഗവ. ബ്രണ്ണൻ കോളേജിൽ നടക്കും. 20-ന് രാവിലെ 10-ന് മന്ത്രി എം.ബി. രാജേഷ് ഉദ്ഘാടനം ചെയ്യും. 18 ഇനങ്ങളിലായി 296 കുട്ടികൾ മാറ്റുരയ്ക്കും. ലളിതഗാനം, നാടൻപാട്ട്, നാടോടിനൃത്തം, മിമിക്രി, പ്രച്ഛന്നവേഷം, ഉപകരണസംഗീതം- ചെണ്ട ആൻഡ് കീബോർഡ്, പെയിന്റിങ് (ക്രയോൺസ്), പെൻസിൽ ഡ്രോയിങ്, എംബോസ് പെയിന്റിങ് തുടങ്ങിയ വ്യക്തിഗത ഇനങ്ങളും സംഘനൃത്തം, ഒപ്പന എന്നിവയുമാണുള്ളത്.
കലോത്സവത്തിന്റെ ഭാഗമായി 18-ന് വൈകീട്ട് 3.30-ന് മുഴപ്പിലങ്ങാട് ബീച്ചിൽ ബലൂൺ പറത്തൽ നടക്കും. ബഡ്സ് സ്‌കൂൾ അദ്ധ്യാപകർക്കായി ഡിജിറ്റൽ പോസ്റ്റർ രചനാമത്സരം, പൊതുജനങ്ങൾക്കായി പ്രവചനമത്സരം എന്നിവയുമുണ്ടാകും. സമാപന സമ്മേളനം ഉദ്ഘാടനവും വിജയികൾക്കുള്ള സമ്മാനവിതരണവും 21-ന് സ്പീക്കർ എ.എൻ. ഷംസീർ നിർവഹിക്കും. ജില്ലാ പഞ്ചായത്ത് പ്രസിഡന്റ് പി.പി. ദിവ്യ, കുടുംബശ്രീ ജില്ലാ മിഷൻ കോ-ഓർഡിനേറ്റർ ഡോ. എം. സുർജിത്, മീഡിയ കമ്മിറ്റി വൈസ് ചെയർമാൻ സെൽവൻ മേലൂർ, കുടുംബശ്രീ അസി. ജില്ലാ മിഷൻ കോ-ഓർഡിനേറ്റർ പി.ഒ. ദീപ, അസി. പ്രോഗ്രാം മാനേജർ ഡാനിയൽ ലിബിനി എന്നിവർ പത്രസമ്മേളനത്തിൽ പങ്കെടുത്തു.
