തിരുവനന്തപുരം: ഉപഭോക്താക്കളുടെ അനുഭവം മെച്ചപ്പെടുത്തുന്ന നിരവധി സവിശേഷതകളോടെ തിരുവനന്തപുരം ടെക്‌നോപാർക്കിന്റെ നവീകരിച്ച വെബ് പോർട്ടലും (www.technopark.org) 'ടെക്‌നോപാർക്ക്, കേരള' (Technopark, Kerala) എന്ന പുതിയ മൊബൈൽ ആപ്പും പുറത്തിറക്കി. ടെക്‌നോപാർക്കിൽ നടന്ന ചടങ്ങിൽ ടെക്‌നോപാർക്ക് സിഇഒ കേണൽ സഞ്ജീവ് നായർ (റിട്ട.) നവീകരിച്ച വെബ്‌സൈറ്റും മൊബൈൽ ആപ്പും പ്രകാശനം ചെയ്തു.
ഭാവിയിലെ മാറ്റങ്ങൾ കൂടി കണക്കിലെടുത്ത് ആഗോളനിലവാരത്തിലുള്ള സവിശേഷതകൾ ഉൾപ്പെടുത്തി നവീകരിച്ച വെബ്‌സൈറ്റ് ഉപഭോക്താക്കളുമായുള്ള ആശയവിനിമയങ്ങൾ ഒറ്റ പ്ലാറ്റ് ഫോമിൽ എത്തിക്കും. രൂപകൽപ്പനയിലും ഭാഷയിലും അവതരണത്തിലും നിരവധി പുതുമകളോടെയാണ് വെബ്‌സൈറ്റ് പുറത്തിറക്കിയിട്ടുള്ളത്.
വളരെ പെട്ടെന്നുള്ള മാറ്റങ്ങൾ പ്രാപ്തമാക്കുന്നതിനായി നോ-കോഡ്/ലോ-കോഡ് പ്ലാറ്റ് ഫോമായി രൂപകൽപ്പന ചെയ്ത പോർട്ടലിന് കണ്ടെന്റ് മാനേജ്‌മെന്റ് സിസ്റ്റം (സിഎംഎസ്), മോഡുലാർ ഘടകങ്ങൾ, ഡോക്യുമെന്റ് മാനേജ്‌മെന്റ്, റോൾ-ബേസ്ഡ് ആക്‌സസ്, സുരക്ഷിതത്വം, സ്‌പേസ് റിക്വസ്റ്റ് ക്യൂ, ടെക്‌നോപാർക്ക് കമ്പനികൾക്കുള്ള ബുക്കിംഗിനും ജോലി അവസരങ്ങൾ അറിയാനുമുള്ള സൗകര്യം തുടങ്ങിയ സവിശേഷതകൾ ഉണ്ട്.
ആൻഡ്രോയിഡ്, ഐഒഎസ് പതിപ്പുകളുള്ള മൊബൈൽ ആപ്പിന് ഡൈനാമിക് കണ്ടന്റ് മാനേജ്‌മെന്റിനു പുറമേ സിഎംഎസ്, ജോലി അന്വേഷണം, കമ്പനി തിരയൽ, അറിയിപ്പുകൾ, പരിപാടികൾ തുടങ്ങിയവ അറിയാനാകും.
ടെക്‌നോപാർക്കിന്റെ ഐടി അധിഷ്ഠിത അന്തരീക്ഷത്തിൽ ജനങ്ങൾ എപ്പോഴും പ്രധാനപ്പെട്ടതാണെന്നും ഇത് ഉൾക്കൊണ്ടാണ് വെബ്‌സൈറ്റിന്റെയും ആപ്പിന്റെയും ഭാഷയും രൂപകൽപ്പയും വിഭാവനം ചെയ്തിട്ടുള്ളതെന്നും കേണൽ സഞ്ജീവ് നായർ (റിട്ട) പറഞ്ഞു. ടെക്‌നോപാർക്കിന്റെ ഈ രണ്ട് പ്ലാറ്റ് ഫോമുകളും ഉപഭോക്താക്കൾക്ക് മികവുറ്റ സേവനം ഉറപ്പാക്കുമെന്നും അദ്ദേഹം പറഞ്ഞു.
ആഗോളനിലവാരത്തിലുള്ള വെബ്‌സൈറ്റും മൊബൈൽ ആപ്പും ടെക്‌നോപാർക്കിന്റെ ലോകമെമ്പാടുമുള്ള ഉപഭോക്താക്കളുടെ ആവശ്യങ്ങൾ വേഗത്തിൽ നിറവേറ്റാൻ സഹായിക്കുമെന്ന് കേരള ഐടി പാർക്ക്‌സ് സിഎംഒ മഞ്ജിത് ചെറിയാൻ പറഞ്ഞു.
ടെക്‌നോപാർക്കിന്റെ ഡിജിറ്റൽ വൈദഗ്ധ്യം ആഗോള തലത്തിലും കമ്പനികളെയും ജീവനക്കാരെയും സമൂഹത്തെയും ആകർഷിക്കുന്നത് പ്രധാനമാണെന്ന് ഐടി മാനേജർ അസീബ് എ കെ പറഞ്ഞു. കമ്പനികൾക്ക് പൊതു സൗകര്യങ്ങളിലേക്കുള്ള പ്രവേശനം, ദ്രുതഗതിയിലുള്ള അറ്റകുറ്റപ്പണികൾ, സ്ഥലം അനുവദിക്കുന്നതിലെ സുതാര്യത, സാമൂഹിക പ്രവർത്തനങ്ങൾ തുടങ്ങിയവ നിറവേറ്റുന്നതിനാണ് രണ്ട് പ്ലാറ്റ് ഫോ മുകളും രൂപകൽപ്പന ചെയ്തിരിക്കുന്നതെന്നും അദ്ദേഹം കൂട്ടിച്ചേർത്തു.
ആപ്പ് ഡൗൺലോഡ് ചെയ്യാനുള്ള ലിങ്ക്: iOS - https://apps.apple.com/in/app/technopark-kerala/id6474728335
ആൻഡ്രോയിഡ്: https://play.google.com/store/apps/details?id=com.technopark.technopark_app
ടെക്‌നോപാർക്ക് സിഎഫ്ഒ ജയന്തി എൽ., പ്രൊജക്ട്‌സ് ജനറൽ മാനേജർ മാധവൻ പ്രവീൺ, കസ്റ്റമർ റിലേഷൻഷിപ്പ് എജിഎം വസന്ത് വരദ, ടെക്‌നോപാർക്കിലെ മറ്റ് ഉദ്യോഗസ്ഥർ, വെബ്‌സൈറ്റ് നവീകരിക്കുകയും മൊബൈൽ ആപ്പ് രൂപകൽപ്പന ചെയ്യുകയും ചെയ്ത കൊച്ചി ആസ്ഥാനമായുള്ള എക്‌സ്‌കോർട്ട്എക്‌സ് അഡ്വാൻസ് സിസ്റ്റംസ് പ്രതിനിധികൾ എന്നിവരും ഉദ്ഘാടന ചടങ്ങിൽ പങ്കെടുത്തു.
