തിരുവനന്തപുരം: സമസ്ത മേഖലകളും ഭിന്നശേഷി സൗഹൃദമാക്കണമെന്ന് കോൺഗ്രസ് പ്രവർത്തക സമിതി അംഗം ഡോ. ശശി തരൂർ എം പി. അംഗപരിമിതർക്ക് നൽകിയിട്ടുള്ള അവകാശങ്ങൾ സർക്കാരും സമൂഹവും പൂർണ്ണമായും അംഗീകരിച്ച് നടപ്പാക്കുന്നില്ല. സർക്കാർ ജോലികളിൽ ഭിന്നശേഷിക്കാർക്കായി നടപ്പാക്കിയ സംവരണം പോലും അട്ടിമറിക്കുന്നുവെന്നും അദ്ദേഹം പറഞ്ഞു. കെ പി സി സി ആസ്ഥാനത്ത് ഡിഫറന്റ്ലി ഏബിൾഡ് പീപ്പിൾസ് കോൺഗ്രസ്സിന്റെ 14 -ാം സ്ഥാപകദിന സമ്മേളനം ഉദ്ഘാടനം ചെയ്തു പ്രസംഗിക്കുക ആയിരുന്നു തരൂർ.
ഡിഫറന്റ്ലി ഏബിൾഡ് പീപ്പിൾസ് കോൺഗ്രസ്സ് സംസ്ഥാന പ്രസിഡന്റ് കൊറ്റാമം വിമൽ കുമാർ അദ്ധ്യക്ഷത വഹിച്ച യോഗത്തിൽ സംസ്ഥാന ജനറൽ സെക്രട്ടറി ഊരൂട്ടമ്പലം വിജയൻ സ്വാഗതം പറഞ്ഞു. ഭിന്നശേഷിക്കാർക്ക് കൂടുതൽ തൊഴിൽ നൽകിയതിന് സംസ്ഥാന സർക്കാർ പുരസ്‌ക്കാരം ലഭിച്ച തിരുവനന്തപുരം ജില്ലാ വികലാംഗ ക്ഷേമ പ്രിന്റിങ് കോ: ഓപ്പറേറ്റീവ് സൊസൈറ്റി പ്രസിഡന്റ് കൊറ്റാമം വിമൽ കുമാർ , കർഷക അവാർഡ് നേടിയ അനിൽ വെറ്റിലകണ്ടം, കോൺഗ്രസ്സ് മണ്ഡലം പ്രസിഡന്റ്മാരായി തെരഞ്ഞെടുക്കപ്പെട്ട ഊരൂട്ടമ്പലം വിജയൻ, ഹനീഫ കുഴുപ്പിള്ളി എന്നിവരെ കെപിസിസി രാഷ്ട്രീയകാര്യ സമിതി അംഗം വി എസ് ശിവകുമാർ സമ്മേളനത്തിൽ വെച്ച് ആദരിച്ചു.
ഭിന്നശേഷിക്കാർ നേരിടുന്ന വെല്ലുവിളികൾ എന്ന വിഷയത്തിൽ സംഘടിപ്പിച്ച സെമിനാർ കെ പി സി സി രാഷ്ട്രീയ കാര്യസമിതി അംഗം ചെറിയാൻ ഫിലിപ്പ് ഉദ്ഘാടനം ചെയ്തു. കെ പി സി സി ജനറൽ സെക്രട്ടറിമാരായ ടി യു രാധാകൃഷ്ണൻ, ജി എസ് ബാബു, യു ഡി എഫ് ജില്ല ചെയർമാൻ പി കെ വേണുഗോപാൽ, ഡിസിസി വൈസ് പ്രസിഡന്റ് ഹരിദാസ്, സി എസ് തോമസ്, പി പി ചന്ദ്രൻ, അനിൽ വെറ്റിലകണ്ടം, ബിനു ഏഴാകുളം, സജീവൻ മേച്ചേരി, ഷാനിഘാൻ എന്നിവർ സംസാരിച്ചു.
ഭിന്നശേഷി സംരക്ഷണ നിയമം പൂർണ്ണമായി നടപ്പിലാക്കുക, തദ്ദേശ സ്വയം ഭരണ സമിതികളിൽ ഭിന്നശേഷി ക്കാർക്ക് സംവരണം നടപ്പിലാക്കുക, ഭിന്നശേഷി പെൻഷൻ 5000 രൂപയാക്കുക, ഭിന്നശേഷി കിടപ്പു രോഗികളെ പരിചരിക്കുന്നതിന് പ്രതിമാസം 10000 രൂപ അനുവദിക്കുക, ഭിന്നശേഷി ക്കാരുടെ വീട്ടുകൾക്ക് നികുതി ഒഴിവാക്കുക തുടങ്ങിയ ആവശ്യങ്ങൾ നടപ്പിലാക്കണമെന്ന് യോഗം സർക്കാരിനോട് ആവശ്യപ്പെട്ടു.
