തിരുവനന്തപുരം: സൗജന്യ സ്‌കൂൾ യൂണിഫോം പദ്ധതിയിൽ തുണി നെയ്ത് നൽകിയ കൈത്തറി നെയ്ത്ത് തൊഴിലാളികൾക്ക് വിതരണം ചെയ്യാൻ 20 കോടി രൂപ അനുവദിച്ച് സംസ്ഥാന സർക്കാർ. ധനമന്ത്രി കെ.എൻ ബാലഗോപാലാണ് ഇക്കാര്യം അറിയിച്ചത്. നേരത്തെ 53 കോടി രൂപ നൽകിയിരുന്നു. ഈ മേഖലയ്ക്ക് തീരുമാനം ആശ്വാസമാണ്.

സൗജന്യ കൈത്തറി സ്‌കൂൾ യൂണിഫോം പദ്ധതിയനുസരിച്ച് ഒന്ന് മുതൽ ഏഴാം ക്ലാസ് വരെ സർക്കാർ സ്‌കൂളുകളിലെ കുട്ടികൾക്ക് രണ്ട് ജോഡി വീതം യൂണിഫോം തുണിയാണ് വിതരണം ചെയ്യുന്നത്.ഒന്ന് മുതൽ നാലാം ക്ലാസ് വരെയുള്ള എയ്ഡഡ് സ്‌കൂളുകളിലെ കുട്ടികൾക്കും രണ്ട് ജോഡി വീതം യൂണിഫോം തുണി ലഭിക്കും. പരമ്പരാഗത വ്യവസായമായ കൈത്തറിയുടെ ഉന്നമനവും സ്‌കൂൾ കുട്ടികൾക്ക് ഗുണനിലവാരമുള്ള യൂണിഫോം ലഭിക്കുന്നതിനുമായാണ് പദ്ധതി ആവിഷ്‌കരിച്ചത്.

തിരുവനന്തപുരം മുതൽ എറണാകുളം വരെ ജില്ലകളിൽ ഹാന്റക്സാണ് യൂണിഫോം തുണി വിതരണം ചെയ്യുന്നത്. തൃശൂർ മുതൽ കാസർഗോഡ് വരെയുള്ള ജില്ലകളിൽ ഹാൻവീവാണ് യൂണിഫോം തുണി വിതരണം നടത്തുന്നത്. 6200 നെയ്ത്തുകാരും, 1600 അനുബന്ധ തൊഴിലാളികളും ഇതുമായി ബന്ധപ്പെട്ട ജോലികളിലേർപ്പെട്ടിട്ടുണ്ട്.