പുനലൂർ: ആറുവയസ്സുകാരിയെ ലൈംഗികമായി പീഡിപ്പിച്ചെന്ന കേസിൽ പ്രതിക്ക് 37 വർഷം കഠിനതടവും പിഴയും വിധിച്ചു. പത്തനംതിട്ട മലയാലപ്പുഴ ചെങ്ങറ സമരഭൂമിയിൽ വിനീഷ് ഭവനിൽ വിനീഷിനെ(23)യാണ് പുനലൂർ ഫാസ്റ്റ് ട്രാക്ക് സ്‌പെഷ്യൽ കോടതി ജഡ്ജി ടി.ഡി.ബൈജു ശിക്ഷിച്ചത്. വിവിധ വകുപ്പുകളിലായാണ് ശിക്ഷ വിധിച്ചത്

പിഴത്തുകയിൽനിന്ന് 25,000 രൂപ അതിജീവിതയ്ക്കു നൽകണം. കൂടാതെ നഷ്ടപരിഹാരമായി അതിജീവിതയ്ക്ക് ഒരുലക്ഷം രൂപ നൽകാൻ ജില്ലാ ലീഗൽ സർവീസസ് അഥോറിറ്റിയോട് ശുപാർശ ചെയ്തു. 2018-ലാണ് പെൺകുട്ടി പീഡിപ്പിക്കപ്പെട്ടത്. മലയാലപ്പുഴ പൊലീസ് രജിസ്റ്റർ ചെയ്ത കേസ് പിന്നീട് പത്തനാപുരം പൊലീസിന് കൈമാറി. സംഭവസ്ഥലം പത്തനാപുരം സ്റ്റേഷൻ അതിർത്തിയാണെന്നു കണ്ടെത്തിയതിനെ തുടർന്നായിരുന്നു ഇത്.

പത്തനാപുരം എസ്‌ഐ. സതീഷ്‌കുമാർ ആരംഭിച്ച അന്വേഷണം ഇൻസ്‌പെക്ടർ വി.സജികുമാർ പൂർത്തിയാക്കി കുറ്റപത്രം സമർപ്പിച്ചു. കോടതിയിൽ പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ കെ.പി.അജിത്ത് ഹാജരായി. ശിശുക്ഷേമസമിതിയിൽനിന്നുള്ള അഭിഭാഷക അർച്ചന പ്രോസിക്യൂഷൻ നടപടികൾ ഏകോപിപ്പിച്ചു.