കൊച്ചി: സിനിമകളിലും ടെലിവിഷനിലും ഒടിടി പ്ലാറ്റ്ഫോമിലും നിയമത്തിന് വിരുദ്ധമായി പുകവലി ദൃശ്യങ്ങൾ കാണിക്കുന്നത് ചോദ്യം ചെയ്ത് ഹൈക്കോടയിൽ ഹർജി. പുകവലിക്കുന്ന ദൃശ്യങ്ങൾ സമൂഹത്തെ സ്വാധീനിക്കുന്നുണ്ടെന്നും ഇത്തരം ദൃശ്യങ്ങളുള്ള പരിപാടികൾക്കു നിരോധനം ഏർപ്പെടുത്തണമെന്നുമാണ് ആവശ്യം. ഹർജിയിൽ കോടതി കേന്ദ്ര- സംസ്ഥാന സർക്കാരുകളുടെ വിശദീകരണം തേടി.

സിഗരറ്റിന്റെയും മറ്റു പുകയില ഉൽപന്നങ്ങളുടെയും പരസ്യങ്ങൾ 2003ലെ നിയമത്തിന്റെ അടിസ്ഥാനത്തിൽ തടഞ്ഞിട്ടുണ്ട്. സിനിമ പോലുള്ളവയിൽ പുകയില ഉൽപന്നങ്ങളുടെ വ്യാപക ഉപയോഗത്തിലൂടെ പരോക്ഷമായ പരസ്യം നൽകുകയാണ്. ചലച്ചിത്ര താരങ്ങളും മറ്റും പുകവലിക്കുന്നതു സമൂഹത്തെയാകെ സ്വാധീനിക്കുന്നു. സിനിമയിലും സീരിയലിലമൊക്കെ പുകയില ഉപയോഗം കാണിച്ച് സാധാരണവത്ക്കരിക്കുന്നുവെന്നുമാണ് ഹർജിയിലെ ആരോപണം.

കേരള വൊളന്ററി ഹെൽത്ത് സർവീസസ് എന്ന സന്നദ്ധ സംഘടനയാണു ഹർജിയുമായി കോടതിയെ സമീപിച്ചത്. 'സിനിമയിലെ പുകവലി രംഗങ്ങൾ കണ്ട് ആളുകൾ പുകവലിച്ചു തുടങ്ങുമെന്ന് നിങ്ങൾ ശരിക്കും കരുതുന്നുണ്ടോ?' ഹൈക്കോടതി വാക്കാൽ പരാമർശിച്ചു. സുഹൃത്തുക്കളുടെയും മറ്റും സ്വാധീനവും ലഭ്യതയുമൊക്കെ പുകവലിക്കു കാരണമാകുന്നുണ്ട്. പലപ്പോഴും സുഹൃത്തുക്കളും മറ്റും വലിക്കുന്നതു കണ്ടാണു പലരും പുകവലിച്ചു തുടങ്ങുന്നതെന്നു കോടതി നിരീക്ഷിച്ചു.