നേന്ത്രവാഴകൾ ലൈനിൽ മുട്ടിയെന്ന് ആരോപണം; കുലച്ചുനിന്ന വാഴകൾ വെട്ടിനീക്കി കെഎസ്ഇബി ജീവനക്കാർ

തൃശൂർ: തൃശൂരിൽ വാഴ കർഷകരോട് വീണ്ടും കെഎസ്ഇബി ജീവനക്കാരുടെ ക്രൂരത. നേന്ത്രവാഴകൾ ലൈനിൽ മുട്ടിയെന്ന് പറഞ്ഞാണ് കെഎസ്ഇബി ജീവനക്കാർ വാഴ വെട്ടി നശിപ്പിച്ചത്. എടത്തിരുത്തി ചൂലൂരിലാണ് സംഭവം. കുലച്ചു നിന്ന പത്തോളം വാഴകളാണ് ലൈനിൽ മുട്ടിയെന്ന പേരിൽ വെട്ടിനശിപ്പിച്ചത്. തൊഴുത്തുംപറമ്പ് സ്വദേശി സന്തോഷും സുഹൃത്തുക്കളും ചേർന്ന് കൃഷി ചെയ്ത വാഴകളാണ് വെട്ടിയത്.

ഇന്ന് ഉച്ചയോടെ വൈദ്യുതി ലൈനിൽ ടച്ചിങ് വെട്ടാനെത്തിയ വലപ്പാട് കെ.എസ്.ഇ.ബി സെക്ഷനിലെ കരാറു ജോലിക്കാരാണ് വാഴകൾ വെട്ടിമാറ്റിയത്. കൃഷി നടത്തുന്ന പറമ്പിലെ മതിൽ ചാടിക്കടന്നായിരുന്നു ജീവനക്കാർ ലൈനിന് താഴത്തെ വാഴകളെല്ലാം വെട്ടി നശിപ്പിച്ചതെന്ന് സന്തോഷ് പറഞ്ഞു. പത്ത് വർഷത്തോളമായി ഈ സ്ഥലത്ത് കൃഷി ചെയ്യുന്നുണ്ട്. എന്നാൽ ഇതുവരെ ലൈനിലൂടെ വൈദ്യുതി പ്രവഹിച്ചിട്ടില്ലെന്നും ഇവർ പറയുന്നു.

സന്തോഷ് വീട്ടിൽ ഉണ്ടായിരുന്നിട്ടും കാരണം പറയാതെയായിരുന്നു വാഴകൾ നശിപ്പിച്ചത്. സംഭവത്തിൽ കൃഷി മന്ത്രിക്കും മുഖ്യമന്ത്രിക്കും പരാതി നൽകുമെന്ന് കർഷകർ പറഞ്ഞു. അതേസമയം ലൈനിൽ തട്ടിനിന്ന വാഴകൾ മാത്രമേ മുറിച്ചിട്ടുള്ളെന്നും ഇതിലേക്ക് വൈദ്യുതി പ്രവേശിച്ചുണ്ടാകുന്ന വൻ ദുരന്തം തടയാനാണ് ശ്രമിച്ചതെന്നും കെഎസ്ഇബി ജീവനക്കാർ പറഞ്ഞു.