ഡൽഹി രജിസ്ട്രേഷൻ കാറിൽ വിദേശമദ്യവും കഞ്ചാവും കടത്തി; മലയാളി യുവതിയടക്കം മൂന്ന് പേർ അറസ്റ്റിൽ
സുൽത്താൻബത്തേരി: വയനാട്ടിൽ അനധികൃതമായി കടത്തിയ ഇന്ത്യൻ നിർമ്മിത വിദേശമദ്യവും കഞ്ചാവുമായി യുവതിയടക്കം മൂന്നുപേർ പിടിയിൽ. തൃശൂർ, ചാവക്കാട് സ്വദേശികളായ തളിക്കുളം കൊപ്പറമ്പിൽ കെ.എ. സുഹൈൽ(34), കാഞ്ഞാണി, ചെമ്പിപറമ്പിൽ സി.എസ്. അനഘ് കൃഷ്ണ(27), കാഞ്ഞാണി, ചെമ്പിപറമ്പിൽ സി.എസ്. ശിഖ(39) എന്നിവരാണ് ബത്തേരി പൊലീസും ജില്ല ലഹരിവിരുദ്ധ സ്‌ക്വാഡും ചേർന്ന് പിടികൂടിയത്.
മുത്തങ്ങ തകരപ്പാടിയിലെ പൊലീസ് ചെക്പോസ്റ്റിന് സമീപം നടത്തിയ പരിശോധനയിലാണ് മൂവർ സംഘം പിടിയിലായത്. സംഘത്തിൽ നിന്ന് 97.25 ഗ്രാം കഞ്ചാവും, അഞ്ച് കുപ്പി ഇന്ത്യൻ നിർമ്മിത വിദേശമദ്യവും പൊലീസ് പിടിച്ചെടുത്തു. ഇവർ സഞ്ചരിച്ച ഡി.എൽ-1 സി.ടി 4212 എന്ന രജിസ്ട്രേഷൻ നമ്പറിലുള്ള വാഹനവും പൊലീസ് കസ്റ്റഡിയിലെടുത്തിട്ടുണ്ട്.
കോടതിയിൽ ഹാജരാക്കിയ പ്രതികളെ റിമാന്റ് ചെയ്തു. മൂന്ന് ദിവസം മുമ്പാണ് യുവതിയടങ്ങുന്ന സംഘത്തെ ബത്തേരി എസ്‌ഐ. കെ.വി. ശശികുമാറിന്റെ നേതൃത്വത്തിലുള്ള പൊലീസ് സംഘം പിടികൂടുന്നത്. ഈ മാസം മൂന്നാം തീയ്യതി നടത്തിയ പരിശോധനയിലാണ് ഇവരെ അറസ്റ്റ് ചെയ്തതെന്ന് പൊലീസ് അറിയിച്ചു.
