കാക്കനാട്: സ്വകാര്യ ബസ് കണ്ടക്ടർ സ്‌കൂൾ വിദ്യാർത്ഥിയുടെ നെഞ്ചിൽ കടിച്ചു. നെഞ്ചിൽ കടിയേറ്റ ഇടപ്പള്ളി സെന്റ് ജോർജ് സ്‌കൂളിലെ പത്താം ക്ലാസ് വിദ്യാർത്ഥി കങ്ങരപ്പടി സ്വദേശി വി.ജെ.കൃഷ്ണജിത്തിനെയാണ് കണ്ടക്ടർ ആക്രമിച്ചത്. മുറിവേറ്റ കുട്ടി തൃക്കാക്കര സഹകരണ ആശുപത്രിയിൽ ചികിത്സ തേടി. വിദ്യാർത്ഥിയുടെ നെഞ്ചിൽ രണ്ടു പല്ലുകളിൽനിന്നേറ്റതിനു സമാനമായ മുറിവുണ്ട്.

ഇന്നലെ വൈകിട്ടാണ് സംഭവം. കങ്ങരപ്പടി റൂട്ടിലെ 'മദീന' ബസിലെ കണ്ടക്ടറാണ് കടിച്ചതെന്ന് വിദ്യാർത്ഥി പറഞ്ഞു. പൊലീസിനും ബാലാവകാശ കമ്മിഷനും മോട്ടർ വാഹന വകുപ്പിനും പരാതി നൽകി. പ്രകോപിതനായ ഇയാൾ മുഖത്തും അടിച്ചു. ഇടപ്പള്ളിയിൽനിന്ന് ബസിൽ കയറിയ തന്നോട് മോശമായ പെരുമാറ്റമായിരുന്നു. ബസിനകത്ത് അങ്ങോട്ടും ഇങ്ങോട്ടും പലതവണ മാറ്റി നിർത്തി. ഇവിടെ നിന്നാൽ പോരേ എന്നു ചോദിച്ചതാണ് കണ്ടക്ടറെ പ്രകോപിപ്പിച്ചതത്രെ. ജഡ്ജിമുക്ക് ബസ് സ്റ്റോപ്പിലെത്തിയപ്പോഴാണ് സംഭവം.