മാനന്തവാടി: തലപ്പുഴ കെഎസ്ഇബി ഓഫിസിനു സമീപം നിയന്ത്രണം വിട്ട ടൂറിസ്റ്റ് ബസ് റോഡരികിൽ നിർത്തിയിട്ടിരുന്ന പിക്കപ്പിൽ ഇടിച്ചുകയറി ആറ് പേർക്ക് പരുക്കേറ്റു. കണ്ണൂർ എ ആർ ക്യാംപിലെ പൊലീസുകാരും കുടുംബവും സഞ്ചരിച്ച ബസാണ് അപകടത്തിൽപ്പെട്ടത്. പരുക്കേറ്റവരെ മാനന്തവാടി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വൈദ്യുതിലൈൻ സ്ഥാപിക്കാനുള്ള പോസ്റ്റുകൾ കയറ്റിയ പിക്കപ്പിലാണ് ബസ് ഇടിച്ചത്.

ഇന്നു രാവിലെ പത്തു മണിയോടെയാണ് സംഭവം. ഇടിയുടെ ആഘാതത്തിൽ വൈദ്യുതി പോസ്റ്റ് ബസിനു മുകളിലേക്കു വീണു. ക്രെയിൻ ഉപയോഗിച്ച് പോസ്റ്റുകൾ മാറ്റുകയായിരുന്നു. ഓഫിസിനു മുന്നിൽ നിർത്തിയിട്ടിരിക്കുന്ന ആറ് ബൈക്കുകൾക്കും കേടുപാടുകൾ സംഭവിച്ചു.