നിലമ്പൂർ: പശ്ചിമ ബംഗാളിൽനിന്ന് എടക്കരയിലേക്ക് തീവണ്ടി മാർഗ്ഗം കടത്തിക്കൊണ്ടുവന്ന 18 കിലോ കഞ്ചാവുമായി നാല് ഇതര സംസ്ഥാന തൊഴിലാളികൾ പിടിയിൽ. എടക്കര പൊലീസ് ഇൻസ്പെക്ടർ എസ്. അനീഷിന്റെ നേതൃത്വത്തിൽ എടക്കര പൊലീസും ഡാൻസാഫ് ടീമും ചേർന്ന് നടത്തിയ പരിശോധനയിലാണ് ശനിയാഴ്ച രാവിലെ 9.00 മണിയോടെ മുട്ടിക്കടവ് പൂച്ചക്കുത്ത് വെച്ച് പ്രതികൾ പിടിയിലായത്.

പശ്ചിമബംഗാൾ സൗത്ത് 24 പർഗാനസ് സ്വദേശികളായ അംജത് ഖാൻ (32), ഖുശിബുൾ (43), അബ്ദുൾ റഹ്‌മാൻ (23), കരീം ഖാൻ (24) എന്നിവരെയാണ് എസ്‌ഐ. സി.പി. റോബർട്ട് അറസ്റ്റ് ചെയ്തത്. അവധിയെടുത്ത് നാട്ടിലേക്ക് പോകുന്ന തൊഴിലാളികൾ അവിടെനിന്ന് കുറഞ്ഞ വിലയ്ക്ക് കഞ്ചാവ് ശേഖരിച്ച് ജില്ലയിലെ ഏജന്റുമാർക്ക് കൈമാറുകയാണ് പതിവ്. ജില്ലയിലേയ്ക്ക് ലഹരിമരുന്ന് കടത്തി വിൽപ്പന നടത്തുന്ന സംഘത്തിലെ പ്രധാന കണ്ണികളാണ് പിടിയിലായത്. വിപണിയിൽ അഞ്ചുലക്ഷത്തോളം രൂപ വിലവരുന്ന കഞ്ചാവാണ് ഇവരിൽനിന്ന് പിടികൂടിയത്.

ഇതരസംസ്ഥാന തൊഴിലാളികൾ മുഖേന കഞ്ചാവ് കടത്തുന്ന സംഘങ്ങളേക്കുറിച്ചും ഏജന്റുമാരെ കുറിച്ചും ജില്ലാ പൊലീസ് മേധാവി ശശിധരന് രഹസ്യവിവരം ലഭിച്ചതിന്റെ അടിസ്ഥാനത്തിൽ നിലമ്പൂർ ഡി.വൈ.എസ്‌പി. പി. എൽ. ഷൈജുവിന്റെ നിർദേശപ്രകാരമായിരുന്നു പരിശോധന. സീനിയർ സിവിൽ പൊലീസ് ഓഫസർ സി.എ. മുജീബ്, പി. വിനോദ്, സി.പി.ഒ. മാരായ അനീഷ് തോമസ്, കെ. സുനീഷ്, പ്രശാന്ത്, സബിൻ, ഡാൻസാഫ് അംഗങ്ങളായ എൻ.പി. സുനിൽ, അഭിലാഷ് കൈപ്പിനി, ആഷിഫ് അലി, നിബിൻ ദാസ്, ജിയോ ജേക്കബ് എന്നിവരും ചേർന്നാണ് പ്രതികളെ പിടികൂടിയത്.

മറുനാടന്‍ മലയാളി

    മറുനാടന്‍ മലയാളി ബ്യൂറോ